Rrugën e shkurtër që e gaboi, vozitësi i pakujdesshëm nga Fröndenberg afër Dortmundit në Gjermani, do të duhet ta paguajë shtrenjtë
Para rrafsh dy muajsh, një fotografi e një veture në metron e Dortmundit filloi të qarkullonte nëpër medie. Një person, me veturën e tij Ford ishte futur në brendësi të një metroje në Dortmund për rreth 800 metra, duke vozitur nëpër binarë. Tashmë është e qartë se për vozitësin do të kushtojë shumë shtrenjtë. Fillimisht dëmi ishte vlerësuar në 3 mijë euro, por autoritetet përkatëse gjermane e kanë korrigjuar shumën duke e ngritur në shifrën prej njëzet mijë euro. „Kemi disa dëme të vogla nëpër binarë, por shuma e shkaktuar është si pasojë e nxjerrjes së veturës nga binarët dhe shpenzimet për personelin në aksion“, ka deklaruar zëdhënsja e metrosë, Britta Heydenbluth. Binarët kanë qenë të bllokuar për plot pesë orë. Fat në fatkeqësi për vozitësin 31-vjeçar: Dëmin e shkaktuar do t`ia paguajë sigurimi, por ai është dashurr ta dorëzojë patentë shoferin në polici. Nga fundi i muajit shkurt, vozitësi e kishte anashkaluar një shenjë në komunikacion duke u futur nëpër binarët e metrosë, ndërsa stacioni i fundit i tij ishte „Barop Parkhaus“. Për fat të mirë, gjatë kësaj nuk pati dëme të tjera. Sipas autoriteteve gjermane, shenjat për paralajmërim të metrosë janë të mjaftueshme, pranadaj ata e heqin nga vetja çdo përgjegjësi.