Policia austriake ka mësuar edhe një truk të hajnave të mërgimtarëve, të cilët mërgimtarët i kanë pritur nëpër pushimoret e autostradave në Austri, duke ua shpuar gomat e veturave dhe në pritje të ndihmës rrugore, ata kanë shfrytëzuar momentin më të volitshmë për të plaçkitur.
Gjatë javës që po e lëmë pas, para trupit gjykues të Gjykatës së qarkut në Oberösterreich është gjendur i akuzuari i parë, një kosovar 51-vjeçar i cili e ka pranuar fajin dhe i cili është dënuar me një vit e gjysmë burg pa kusht. „Ne e kemi shfrytëzuar kohën e ndërrimit të gomave për të realizuar plaçkitjet“, ka deklaruar kosovari i dënuar edhe në parë në Itali dhe Çeki. Sipas akteve policore, ai kishte vepruar në Ober- dhe Niederösterreich, si dhe në Salzburg. Autorët kryesisht i kanë plaçkitur personat nga ish Jugosllavia, të cilët kanë qenë rrugës për në vendlindje për t`i vizituar të afërmit e tyre, duke u plaçkitur të holla dhe stoli.
Në akuzën lidhur me bashkëpunimin me ndonjë bandë, i akuzuari ka mohuar kategorikisht. „Nuk kam lidhje me kurrfarë bande“, ka pohuar ai, njofton „Shtegu.com“. Ai ka qenë i akuzuar për tre raste, me ç`rast, hera e tretë i kishte dështuar pasi ishte hetuar nga policia dhe menjëherë ishte arrestuar. „Aktet e tilla janë të pakëndshme dhe paraqesin rrezik për vitimën“, ka pohuar gjykatësi Benedikt Weixlbaumer. Kosovarit nuk i ka mbetur gjë tjetër, por vetëm ta pranojë dënimin i cili është i plotfuqishëm.