Ndalesë fluturimi për pesë vite dhe gjobë në të holla në vlerë prej 600 eurosh ka marrë një pasagjer i fluturimit në relacionin prej Edinburgu deri në Amsterdam, nga kompania ajrore holandeze KLM. Në të vërtetë, pasagjeri James Gray, gjatë fluturimit të avionit, në një lartësi prej nëntë mijë metrash, ka tentuar të hapë derën e avionit, duke menduar se bëhet fjalë për derë të WC-së.
Porsa avioni ka aterruar në aeroportin Schiphol të Amsterdamit, ai është ndaluar nga policia dhe është dërguar në paraburgim.
„U përpoqa tu spjegoj se bëhet fjalë për një gabim të thjeshtë, thjeshtë, vetëm u habita. Por, pas aterrimit, erdhi policia dhe më arrestoi duke mos u sjellur aspak miqësisht“, ka deklaruar Gray për mediet lokale, transmeton „Shtegu.com“.
Ai pohon se aspak nuk e ka pasur ndërmend të hapë derën e avionit, por se bëhet fjalë vetëm për një gabim, ndërsa askush nuk ka dashur t`i besojë.
Nga ana tjetër, kompanija KLM ka komunikuar se pasagjeri i është dorëzuar autoriteteve për shkak të „sjelljes së keqe“ gjatë udhëtimit.
