02:21:25 2015-12-26
Destan Gashi vjen nga Kosova dhe zemra e tij rrah për skulpturën. Për çdo ditë ai udhëton nga Vjena për në Himberg, ku është e vendosur atelieja e tij.
„Më me dëshirë jam këtu i vetmuar, pasi kam nevojë për qetësi gjatë punës, duke dëgjuar më së shpeshti muzikë klasike“, spjegon akademiku skulptor kosovar për „Noen.at“, njofton „Shtegu.com“. Mjetet e tij për punë janë më të rëndësishmet në profesionin e tij. Më herët ai i bënte modelet e tij nga letra apo balta, për t`ia filluar më pas me skulpturën nga guri. Përvoja e tij shumëvjeçare dhe studimet e shumtë në natyrë dhe në Akademinë e Brukselit, atij i mundësojnë që skulpturën ta punojë pa kurrfarë modeli.
Në fillim të punimit të tij të fundit, guri nga mermeri ka peshuar 150 kilogramë. Ai është duke skulpturuar një „grua të dëshpëruar“, ndërsa guri është tepër i fortë dhe 380 milionë vite i vjetër. Deri më tani ai i ka „shkëputur“ 105 kilogramë, për një kohë prej gjashtë javësh, ndërsa kërkesa është nga një çift bashkëshortësh. „Për `të dëshpëruarën` më ka inspiruar ura 19 metërshe mbi Drin, në vendlindjen time, Kosovë, ku shpeshë organizohen gara për kërcime nga ura. Si i ri, shpeshëherë i kam përcjellë këto gara“, ka përfunduar skulptori kosovar që shumë herë ka qenë temë e medieve austriake.