„Romeo e Xhulieta“ kosovare brengosin francezët

Tek Rama 22-vjeçare dhe Fatoni 25-vjeçar, dashuria është mbi të gjitha. Tashmë dy vite, kosovarët e rinj janë arratisur nga Mitrovica, vendlindja e tyre, për t`iu shmangur kërcënimeve të familjes së vajtzës së re. Të afërmit e saj nuk e kanë akceptuar jetën e tyre idilike duke i kërcënuar me jetë, shkruan e përditshmja franceze „La voix du Nord“.
„Është një histori e ngjashme mes `Romeos e Xhulietës`“, ka spjeguar Jean-Pierre Mougel, avokat francez, i cili i ka dalë në ndihmë çiftit të ri për të rregulluar qëndrimin në Francë. Në veri të Kosovës, në Mitrovicë, babai i Ramës me prejardhje nga një familje e pasur, nuk ka pranuar që e bija e tij të bie në dashuri me Fatonin, një djalosh nga një rang më i ulët social. Nga muaji gusht, e deri në tetor të vitit 2012, ajo, nga prindërit i ishte premtuar një burri shumë më të vjetër e më të pasur, me ç`rast ka qenë edhe e rrahur që të pranojë fatin e imponuar. Por, më 7 tetor, ajo ishte bashkuar me Fatonin duke u shpëtuar kërcënimeve, ndërsa në janar të vitit 2013 ishin arratisur për në Francë. Nga idila e tyre ka lindur edhe një djalë që tashmë është i moshës mbi njëvjeçare.
Çifti betohet se po të kthehet në vendlindje, do të kërcënohej përsëri nga familja e Ramës, kështu që ata kërkojnë statutin e refugjatit në Francë.
Rama dhe Fatoni kanë sjellë disa dëshmi se ndaj tyre është ushtruar presion: Një certifikatë të policisë e cila dëshmon se vajza e re ka ngritur kallëzim penal për rrëmbim dhe dhunë, një letër nga daja i Fatonit i cili dëshmon se i ka fshehur të rinjtë para se të arrtisen etj. Por, këto dëshmi nuk mjaftojnë për kërkesën e tyre për strehim pranë Gjykatës nacionale për të drejta e azilit në Paris, ndërsa një kërkesë e tillë ishte refuzuar edhe nga l`OFPRA (Zyra për mbrojtjen e refugjatëve dhe personave pa shtetësi).
„Franca bën dallim në mes të një refugjati politik dhe një refugjati i cili është arratisur i kërcënuar nga një hakmarrje private“, spjegon avokati. Përse familja e Ramës nuk ndiqet penalisht për ushtrim të dhunës ? Në Kosovë, ku mentaliteti tradicional i jep të drejtën kryefamiljarit, ende ekziston tradita e vrasjes për nderin e familjes. Rama dhe Fatoni, me ndihmën e avokatiti të tyre, do të bëjnë një kërkesë tjetër në komunën Dunkerque, deri në instancat e fundit. Çifti i ri, nuk pranon më shumë se një mëditje të vogël nga Kryqi i kuq francez, e cila nuk mjafton për të mbijetuar.