23:54:25 2016-02-06
Gjykata zvicerane ia ka zvogëluar dënimin imamit kosovar i cili e kishte keqtrajtuar bashkëshorten e vet, prej gjashtë, në pesë vite burg. Ai nuk ka mundur të jetë i pranishëm në seancën gjyqësore, pasi paraprakisht ishte dëbuar ngë Zvicra.
Lëndime trupore, kërcënim, rrëmbim, dhunim: Imami 24-vjeçar kosovar, lënda e të cilit u shqyrtua të mërkurën nga Gjykata e Apelit në Neuchatel të Zvicrës, nuk e kishte kursyer aspak ish bashkëshorten e vet, të martuar për një kohë ekspres. Aktet e shpeshta të dhunshme, kanë qenë argument që vitin e kaluar ai të dënohet për gjashtë vite burg, raporton „L’Express“, njofton „Shtegu.com“. Kosovari i akuzuar, i cili në vendlindje kishte ushtruar profesionin e imamit, kishte bërë ankesë rreth vendimit dhe kjo ishte arsyeja që gjykata zvicerane sërish ta shqyrtojë lëndën e tij gjatë javës që po lëmë pas.
Gjykata kantonale kishte ndryshuar vendimin pa praninë e tij, pasi ai ishte dëbuar nga Zvicra pas vuajtjes së një pjese të dënimit në periudhën prej 2013-2014. Avokati i tij mbrojtës, në seancën e së mërkurës kishte deklaruar se nuk ka prova e as dëshmitarë se i akuzuari ka kryer të gjitha këto vepra, duke kërkuar lirimin e mandantit të tij. Por, fjalët e tij, kishin hyrë në njërin e kishin dalur nga veshi tjetër i trupit gjykues, i cili megjithatë e reduktoi dënimin e tij nga gjashtë, në pesë vite burg. Gjykata e mori parasysh faktin se përgjegjësia e imamit kosovar ishte zvogëluar, pasi në prill të vitit të kaluar ishte arrestuar në mënyrë jashtligjore.