Në rrugëtimin e diasporës shqiptare gjithmonë ka pasur dhe do të ketë histori sakrifice, përpjekjeje dhe integrimi. Por ka edhe histori që shndërrohen në model. Një prej tyre është ajo e personazhit të këtij shkrimi. Është historia e Setki Ibraimit, shqiptarit nga Tetova që sot është një nga zërat më të respektuar të komunitetit shqiptar në Austri.
Ai nuk është thjesht një emër në politikën lokale austriake. Është një rrëfim i gjallë se si identiteti, puna dhe përkushtimi mund të ndërtojnë ura mes dy vendeve, mes dy kulturave, mes dy realiteteve. Në një kohë kur roli i diasporës shqiptare po merr gjithnjë e më shumë peshë në Europë, emri i Setki Ibraimit spikat si një nga figurat më aktive dhe përfaqësuese të komunitetit shqiptar në Austri.
Setki Ibraimi nuk i harroi kurrë rrënjët. I lindur në Tetovë, në një familje me vlera të forta kombëtare dhe qytetare, Setki Ibraimi u rrit me ndjenjën e përgjegjësisë ndaj komunitetit. Që në rini u dallua për energjinë, zgjuarsinë dhe shpirtin organizativ. Por mbi të gjitha, ai jetësoi dhe dëshmoi bindjen se shqiptari duhet të jetë aktiv kudo që jeton.
Kur emigroi në Austri, ai nuk zgjodhi rrugën e heshtjes. Zgjodhi angazhimin. Zgjodhi integrimin si pjesëmarrje dhe jo si asimilim.
Në Austri, Setki Ibraimi u bë një zë i fortë për integrimin dinjitoz të emigrantëve. Për të, integrimi nuk do të thotë të harrosh prejardhjen, por të kontribuosh me vlerat e tua në shoqërinë që të mirëpret.
Puna e tij u kurorëzua me besimin e qytetarëve të Stockerau, ku u zgjodh asambleist dhe arriti të fitojë tre mandate radhazi, si pjesë e Partisë Popullore Austriake (ÖVP). Ky nuk është thjesht sukses elektoral. Është dëshmi e besueshmërisë, seriozitetit dhe kredibilitetit që ai ka ndërtuar ndër vite.
Fakti që një shqiptar nga Maqedonia e Veriut fiton tre herë radhazi besimin e elektoratit austriak, flet më shumë se çdo shkrim e fjalim.
Për kontribute të larta në bashkëjetesën dhe përfshirjen sociale, ai është nderuar edhe me titullin “Ambasador për Integrimin e të Huajve në Republikën e Austrisë”, një vlerësim që e pozicionon si urë komunikimi mes komuniteteve.
Por Setki Ibraimi nuk është vetëm politikan. Natyrisht që e adhuron politikën dhe është pjesë aktive e saj, por nuk është adhurues vetëm i politikave të ftohta. Ai është promotor i politikës me shpirt kulture. Këtë e vërteton angazhimi i tij si promovues i kulturës shqiptare në diasporë. Si një nga iniciatorët e Shoqatës së Shkrimtarëve “Fan Noli” në Stockerau, ai ka mbështetur fuqishëm ruajtjen e gjuhës dhe trashëgimisë kulturore shqiptare në mërgatë. E gjitha kjo, sepse ai beson se identiteti nuk ruhet me fjalë, por me veprim.
Angazhimi i tij ka kaluar kufijtë e Austrisë. Ai është anëtar i Akademisë Shqiptaro-Amerikane të Shkencave dhe Arteve në New York dhe mban titullin “Ambasador i Paqes”, duke përfaqësuar vlera dialogu dhe bashkëpunimi ndërkulturor në nivel ndërkombëtar.
Figura e Setki Ibraimit përfaqëson një brez të ri shqiptarësh në Europë. Një brez shqiptarësh të integruar, të arsimuar, të përfshirë dhe të vetëdijshëm për përgjegjësinë që mbart përfaqësimi publik. Një brez i ri që nuk kërkon vetëm sukses, por ndikim.
Ai dëshmon se emigrimi nuk është fund ëndrrash, por fillim qëllimesh. Se suksesi personal nuk ka vlerë nëse nuk shndërrohet në shërbim për komunitetin. Se politika nuk është vetëm pushtet, por përgjegjësi.
Nga Tetova në Austri, rrugëtimi i tij është histori pune, besimi dhe këmbënguljeje. Në një Europë që përballet me sfida integrimi dhe diversiteti, figura si ajo e Setki Ibraimit tregojnë se komunitetet nuk janë barriera. Me angazhim, përkushtim e bashkëpunim, ato mund të jenë vetëm ura lidhëse të fuqishme.
Dhe pikërisht kjo, është arritja më e madhe e tij.
Të dëshmojë se shqiptari në diasporë mund të jetë jo vetëm i integruar, por edhe vendimmarrës.
Lola Shehi
Tiranë, 25/02/2025