Klubi i Futbollit “Fortuna 2009” nga Hasanbegu i Maqedonisë, me grupmoshat e saja të reja U12 për një javë të plotë qëndroi në Zvicër ku mori pjesë në tre turne ndërkombëtare që u mbajtën në Baden dhe Cyrih. Ekipi patën një paraqitje të shkëlqyeshme në këto turne, pasi edhe i fituan që të tre me një dominim total. Në turneun e Badenit, deri tek triumfi i plotë “Fortuna 2009” erdhi me 6 fitore dhe 1 barazim, me një golaverazh fantastik 26:3, përderisa në finale luajti me FC Klingnau të cilin e mundën me 5:0.
Në dy turnetë e zhvilluar në Cyrih gjenerata 2003 turneun e fitoi me vetëm 1 humbje në gjashtë ndeshje, me një golaverazh prej 18:2. Në finale Fortuna u përball me FC Unterstars të cilët i munën me 3:1. Ndërsa ekipi “B” apo gjenerata 2004 e përforcuar me 3 futbollistë gjenerata 2003, triumfoi me 1 humbje dhe 1 barazim me gol averazhin 10:3. Këta në finale e mundën FC “Avellino Zurigo”. Pjesëmarrjen dhe qëndrimin njëjavor të Fortuna 2009, në Zvicër e mundësuan mërgimtarët tanë.
Pas kthimit në Shkup, drejtuesit e “Fortuna 2009”, shprehen të kënaqur nga rezultatet por edhe nga mikpritja e bashkatdhetarëve tanë. “Çfarë do që të thuash, mund të gabosh, pasi nuk gjenden fjalë të mira për të përshkruar një mikpritje që na bënë Mursel Ibraimi, familja dhe shokët e tij. Ndërsa sa iu përket rezultateve ne jemi më se të kënaqur, pasi ato erdhën si rrjedhojë e gjithë asaj që na u ofrua nga vëllezërit tanë që kishin organizuar një logjistik shumë të mirë që fëmijëve tanë mos t’ju mungojë asgjë dhe të ndihen sikurse të jenë në shtëpitë e tyre.”, thotë trajneri Safet Ademi. KF “Fortuna 2009”, përbëhet nga futbollistë që vijnë nga zona e Karadakut, duke u nisur nga Matejçi, Haraçina, Inxhikova, Straçinca e për të përfunduar në Hasanbeg ku është edhe selia e kësaj skuadre.
Se çfarë punë të mrekullueshme dhe njerëzore ka bërë Mursel Ibraimi, familja dhe shokët e tij, për fëmijët shqiptarë nga Maqedonia, dëshmojnë edhe mbresat dhe urimet e trajnerit Safet Ademi, i cili në postimin e tij në Facebook, ka shkruar:
„Nuk dimë se në çfarë mënyrë t’ju falënderohemi bashkë atdhetarëve tanë, pasi çdo fjalë e thënë mund të kenë një vlerë të vogël për falënderimin tonë por allahut po i drejtohemi me një lutje.
“O Perëndi, na udhëzo në rrugë të drejtë dhe na bëjë prej atyre, që edhe ne të tjerët t’i udhëzojmë në rrugën e drejtë me të cilën Ti je i kënaqur.
O Perëndi, na lejo që gjitha ato të mira që na i ofruan, t’ua kthemë me të mirë.
O Perëndi, na mundëso që familja e mikpritësve tanë ( Mursel Ibraimi) dhe shokëve të tij që e ndihmuan, të na e bëjnë HALLALL.“
Një iniciativë e cila pa dyshim se zgjon ndjenja të papërshkruara, duke marrë parasysh situatën e tmerrshme sociale në Maqedoni dhe entuziazmin e pashoq të këtyre fëmijëve për të dëshmuar veten se janë talentë të rrallë sportivë. Të shpresojmë se një iniciativë e tillë nuk do të jetë edhe e fundit nga mërgimtarët tanë në Zvicër e më gjerë.
08:00:08 2015-12-02