Lidhur me vrasjen e studentit shqiptar Xhuliano B. më 9 qershor në Wemmel të Belgjikës, e përditshmja belge „L` Avenir shkruan se hetimet lidhur me masakrimin e tij janë në vazhdim e sipër, ndërsa tashmë personi Vincent D.B. është i dyshuar për masakrimin e trupit të shqiptarit dhe po mbahet në arrest, ndërsa bashkëpunëtori i tij i dyshuar, është arratisur në Maqedoni.
Të përkujtojmë se trupi i studentit shqiptar ishte zbuluar në një fushë, ku kufoma e masakruar u gjet nga disa punonjës të bashkisë Jette, në një çantë të madhe. Mbetjet trupore u dërguan menjëherë pranë Mjekësisë Ligjore. Një pedagog i Mjekësisë dhe ekspertët mjekoligjorë kishin shkuar në vendin ku u gjet trupi i pajetë, ndërsa prokurorët në Halle-Vilvoorde nisën hetimet që u fokusuan kryesisht në identifikimin e kufomës dhe përcaktimin e shkaqeve dhe rrethanave të vdekjes së tij.
Ende nuk dihet shkaku dhe rrethanat e vdekjes, por ekspertët thanë se 22-vjeçari ishte skeduar më parë për rrahje dhe trafik kanabisi. Ai ishte student në vitin e parë të Universitetit Libre në Bruksel, ku studionte për Drejtësi dhe Kriminalistikë. Mësohet se janë lajmëruar familjarët, teksa po kryen hetimet për të përcaktuar rrethanat e vrasjes.
