Pasditen e së shtunës, një vozitës i ri kosovar 19-vjeçar, në një kthesë në Eiken të Zvicrës, ka humbur kontrollin mbi veturën e tij, e cila është rrokullisur disa herë, ndërsa vozitësi ka pasur fat të madh duke shpëtuar pa lëndime.
Fat të madh ka pasur një kosovar i ri, i cili porsa e kishte marrë patentë shoferin, pasditen e së shtunës , është rrokullisur disa herë me veturën e tij në një rrugë në Eiken të Kantonit Aargau: Për fatin e tij të madh, edhe përpos veturës së dëmtuar rëndë, ai ka kaluar pa ndonjë lëndim, duke u liruar personalisht nga vetura.
Sipas një komunikate të Policisë kantonale të Aargaut, kosovari me vendbanim në rajon e kishte humbur kontrollin mbi veturën e tij në një kthesë të majtë, duke e goditur një barrierë metalike rrugore, njofton „Shtegu.com“. Si pasojë e kësaj, ai është rrokullisur disa herë me veturën, e cila si për çudi është ndalur në pozitën normale mbi rrota.
Personi në fjalë menjëherë është dërguar në spitalin më të afërt për kontroll. Për disa orë me radhë, rruga ka qenë e bllokuar përderisa nuk është pastruar e rregulluar vendi i aksidentit. Për shkaqe sigurie, të riut i është konfiskuar përkohësisht patenta e shoferit.