KF “Liria”, krenaria e shqiptarëve në Aargau të Zvicrës (FOTO)

225 Lexime

Reshat Ibrahimi

Me ftesë të presidentit të KF “Liria” nga Aargau, Alirami Ramani që është me prejardhje nga Çerkezi i Kumanovës, gazeta “Lajm” mori pjesë në turneun e parë në futboll të organizuar nga Unioni i klubeve shqiptare të futbollit në Zvicër (UKSHFZ).

Dhe, gjatë qëndrimit tonë atje fillimisht i bëmë një vizitë klubit të futbollit “Liria” nga Aargau, një klub modest, që garon në ligën e katër të Kantonit të Aargaus. Prania jonë në mesin e tyre ishte një befasi e mrekullueshme për ta. Presidenti Ramani na prezantoi para futbollistëve, ndërsa ata më uruan mirë se ardhje në Zvicër.

KF Liria dispononte me dy fusha futbolli, secila më e mirë se tjetra, me dhoma të zhveshjes, banjo, e çka jo tjetër. Nga ajo që pashë unë mbeta i habitur, pasi kushte të tilla nuk mund t’i gjesh as në ligën e parë të Maqedonisë në futboll!
Atë pasdite kryesia e klubit u shpërndante futbollistëve tuta (trenerka) sportive për pjesëmarrje në turneun e futbollit në Hutwil afër Bernës që organizohej nga UKSHFZ. Në tutat e tyre dominonte ngjyra e kuqe me logon e emrit të klubit-KF “Liria”. Lojtarët ishin të entuziazmuar. KF Liria përbëhej nga emigrantët që vinin nga trevat shqiptare të Kosovës, Maqedonisë dhe Luginës së  Preshevës.

Verën e ardhshme bëhen 15 vite që kur është themeluar klubi shqiptar, një jubile që pritet të festohet.
Besim Ramadani me prejardhje nga Ferizaji, njëri prej themeluesve të klubit, trajner i licencuar, profesor i edukatës fizike, tregon për historikun dhe sukseset e KF Liria.

KF Liria-Aargau

liria
“Po, KF Liria nga Aargau është themeluar në fillim të qershorit të vitit 2001. Klubi funksionon në baza vullnetare. Momentalisht jemi në ligën e katërt të kantonit të Aargaus. 13 vite me radhë kemi bërë gara në ligën e tretë, një sezon në ligën e katër. Rregullisht kemi marrë pjesë në kupën kantonale, ku kemi arritur të kualifikohemi deri në raundin e tretë. Në vitin 2009 jemi shpallur ekipi më i disiplinuar në mesin e 75 klubeve në kantonin e Aargaus”.

i theksoi se klubi i tyre për shumë lojtarë ka qenë një trampolinë për të kaluar në skuadrat tjera.

Ndërsa, presidenti i ri i KF Liria, Alirami Ramani me origjinë nga Kumanova, rrëfen për kampionatin e kaluar dhe për objektivat në sezonin e ri garues.

Alirami Ramani, presidenti i KF Liria

alirami ramani

„Sezoni i shkuar nuk ishte shumë i mirë për ne, ngase nuk arritëm të qëndrojmë në ligën e tretë. Prej këtu erdhi deri te ndryshimi në kryesinë e klubit. Për momentin jemi një ekip shumë i mirë në kryesi, që të gjithë në një moshë të re 30-35 vjeç. Përveç kësaj jemi edhe shokë të mirë dhe shpresojmë të kemi suksese në të ardhmen. Jemi duke punuar mjaftë që të arrijmë aty ku KF Liria e ka edhe vendin”, deklaroi ai.

Presidenti i klubit Ramani flet me mburrje për futbollistët e tij, të cilët vijnë nga të gjitha trojet shqiptare.

“Në ekip kemi djem shumë të mirë. Janë pothuajse nga të gjitha trojet shqiptare, të cilët edhe në vendet e tyre të punës gëzojnë autoritet të madh. Një pjesë e konsiderueshme e lojtarëve tanë janë me përgjegjësi tëlarta në firmat ku punojnë. KF Liria ka një emër në Kantonin Aargau, ngaqë është klubi shqiptar i parë i themeluar këtu. Kemi treguar edhe shembuj në suksese dhe disiplinë ashtu që kemi arritur të fitojmë edhe kupën e fair-play të kantonit. Për në fund ju falënderojmë edhe gazetën ‘Lajm’ që ndau kohë sado pak edhe për ne”, shtoi Aliramani, presidenti ambicioz i klubit i KF Liria.
Gazeta “Lajm” uron që në 15-vjetorin e themelimit të ngjiten një kategori më lartë dhe të kenë një arsye më të fortë për të festuar jubileun e tyre.