23:16:05 2019-03-31
Imami kontradiktor, Ardian Elezi, të moshuarën 75-vjeçare që vrau Iliasin e vogël shtatëvjeçar, e përshkruan si terroriste. Ky predikuesi është nën vëzhgimin e një task force zvicerane.
Imami Ardian Elezi (28), vrasjen e Iliasit të vogël në Bazel, e ka shfrytëzuar për qëllimet e tij dhe ka postuar një video në kanalin e tij Youtube, një javë pas vrasjes së Iliasit, shkruan „20 Minuten“, përcjell Shtegu.com. Imam Elezi predikon në intervale të rregullta para komunitetit të tij në internet, i cili përfshin dhjetëra mijëra ndjekës. Deri më tash, këtë postim e kanë shikuar 62’000 persona, të cilin ai e kishte incizuar gjatë marshimit të pikëllimit para vendngjarjes.
„Kjo e moshuar është terroriste“, thotë ai për vrasësen 75-vjeçare. Ai e konsideron „shumë problematik“ faktin se nga autoritetet vendore gruaja është përshkruar si e sëmurë mendore. Për te është shumë e qartë se gruaja nuk është e sëmurë. Me një vështrim interrogativ, në kamerë ai parashtron pyetjen, përse vepra ka ndodhur në rrugë dhe jo në një repart psikiatrik, nëse vrasësja është aq e sëmurë sa është komunikuar.
„Tmerri nuk ka fe, terrori nuk ka kombësi, terrori nuk ka ngjyrë të lëkurës“, thotë ai për audiencën e tij. Pas pyetjes së „bz Basel“ përse ai flet për terrorizëm kundër fakteve, ai përgjigjet se jo domosdoshmërisht një organizatë duhet të jetë pas një akti të terrorizmit. Për të, mizoria e një krimi është vendimtare, përcjell Shtegu.com.
Me videon e tij Elezi e rrit urrejtjen. Kolona e komenteve dominohet nga zemërimi dhe fyerjet. Njëri nga komentuesit e barazon krishterimin me terrorizmin. Ai nuk merr përgjegjësi për komentet e urrejtjes, ka deklaruar imami për gazetë.
Mendimet dhe deklaratat e 28-vjeçarit janë shumë kontradiktore. Në të kaluarën ai kishte folur për homoseksualët dhe notimin në bikini. Ai është nën vëzhgim të një task force nga Bazeli.