16:13:30 2016-12-11
Natën e së martës, policia gjermane ka kontrolluar një veturë me autotarga italiane të llojit „Hyundai“, duke përjetuar befasi pas befasie.
Policia gjermane e Rosenheimit të Bavarisë, natën e së martës ka kontrolluar një veturë me autotarga italiane, në autostradën A8, në afërsi të lokacionit Holzkirchen. Në timon ka qenë i ulur një person 48-vjeçar, i cili ka folur italisht në mënyrë të përsosur dhe është legjitimuar me dokument italian.
Përkundër kualitetit të shkëlqyeshëm, është dëshmuar se bëhet fjalë për dokument identifikimi fallso, ndërsa patenta e shoferit ka qenë e rregullt. Policia gjermane kishte dyshuar në personin në fjalë, duke e tërhequr nga komunikacioni për një kontrollë më detale, shkruan „Merkur“, njofton „Shtegu.com“. Gjatë kësaj është vërtetuar se „italiani“ në të vërtetë ka qenë një shtetas maqedonas, i cili jeton në Itali prej shumë vitesh. Nacionaliteti i tij i vetëzgjedhur, atij i kishte mundësuar që të udhëtojë nëpër Europë pa kurrfarë vize.
Pas disa hetimeve të mëtutjeshme është vërtetuar se ai ka qenë i kërkuar që prej dy vitesh nga Prokuroria e Hamburgut, si i dyshuar për një plaçkitje në një banesë. Bashkudhëtari i vet, është legjitimuar me një pasaportë rome, e cila nuk ka vlerë juridike. Shumë shpejt u vërtetua se edhe ai është me prejardhje nga Maqedonia.
Por, befasia e radhës erdhi menjëherë pasi policia zbuloi edhe një banknotë të falsifikuar 20-euroshe në koopertinën për mbrojtje nga dielli të veturës.
Të arrestuarit janë dërguar për procedurë të mëtutjeshme në policinë për krime në Rosenheim, ndërsa hetimet janë në rrjedhë e sipër.