„Nuk e di ende se ku do të shkoj tani“, ka pohuar shqiptari nga Kosova gjatë qëndrimit në spitalin e përgjithshëm të qytetit, me ç` rast ai ishte reanimuar pas një sulmi kardiovaskular të rrezikshëm për jetën.
05:33:06 2015-12-21
Rustem Emini (44) nga Haspe i Gjermanisë, të hënën e kaluar ka humbur tërë pronën e tij në rrugën „Kölner Straße 44“. Zjarri si duket ishte shkaktuar në banesën përdhese 80 metrash katrorë të Rustemit, pasi ky prind i pesëfishtë i ndarë, kishte ndezur disa drita dhe më pas e kishte zënë gjumi. Gjumi i doli nga tymi i zjarrit që tashmë e kishte kapluar banesën e tij. Menjëherë e kishte vërejtur se situata ishte shumë serioze dhe kishte filluar t`i alarmojë fqinjët e vet: „Zjarr, zjarr, të gjithë jashtë nga ndërtesa“, kishte bërtitur me të madhe. Në katin e parë kanë qenë duke banuar shtetasi gjerman Markus Schmidt (31) dhe Jennifer Gottschalk (30) me tre fëmijët e tyre të vegjël (6-, 1-vjeçar dhe 8 muajsh) dhe një mik të tyre të cilët kanë qenë duke darkuar. „E morëm foshnjen dhe dolëm jashtë, ndërsa ende nuk më hiqet nga veshët zhurma e zjarrit që kaplonte gjithçka“, rrëfen nëna për „Die Westen“, njofton „Shtegu.com“.
Edhe një grua me dy fëmijë nga kati i dytë kishte arritur të dalë me kohë jashtë ndërtesës. Pasi të gjithë banuesit kishit arritur të shpëtonin nga flakët e zjarrit, fqinja Jennifer Gottschalk kishte vërejtur se Rustem Emini që po e mbante derën hapur me forcën e tij të fundit, nuk dukej askund. Për një çast, ajo ishte kthyer në ndërtesën e mbuluar me tym dhe kishte gjetur Rustemin e shtrirë përtokë e pa vetëdije.
„E kapa nën sqetulla dhe e tërhoqa jashtë“, pohon fqinja. Pas pak kohe kishte ardhur një mjek dhe e kishte reanimuar Rustemin, i cili ishte thithur sasi të madhe të tymit. Pasi e kishte kaluar një natë në repartin intensiv në spital, ai tashmë ishte ndjerë shumë më mirë: „Jam shumë i lumtur që askush nga ndërtesa nuk pësoi“, pohon me një dozë gëzimi.
Por, në katër muret e tij, ai nuk do të mund të kthehet më asnjëherë, pasi sipas të dhënave policore, banesa është e pabanueshme. Rustemi është duke jetuar në Gjermani tash e 23 vite dhe punon në një firmë higjienike. Ai është duke menduar që gjatë ndërrimit të motmoteve të shkojë në Kosovë, për ta vizituar t`ëmën, pasi tashmë tre vite nuk ka qenë atje.