Gjest i shqiponjës dykrenore në Serbi, dëbohen për dhjetë vjet zviceranët

Dy zviceranë u dënuan të enjten me dëbim nga Serbia. Ata kishin shfaqur në publik shqiponjën dykrenore – provokim për vendin

Të shtunën e kaluar, dy zviceranë janë arrestuar në kryeqytetin serb Beograd, pasi kanë treguar gjestin e shqiponjës dykrenore para Kuvendit të Serbisë dhe njëri prej tyre e ka fotografuar.

Pas një gjykimi të shkurtuar me pranimin e fajësisë, ata u dënuan me kusht për „nxitje të urrejtjes“ dhe nuk lejohen më të shkelin në tokën serbe për dhjetë vitet e ardhshme. Për këtë raporton “Le Matin”, duke cituar zyrën e prokurorit publik vendas, transmeton portali Shtegu.

Provokim për Serbinë

Njëri prej personave u dënua gjithashtu me gjashtë muaj burgim me kusht për „kryerjen e veprës penale të nxitjes së urrejtjes dhe intolerancës kombëtare, racore dhe fetare duke ndihmuar në fotografimin e të pandehurit tjetër ndërsa ai po bënte gjestin e shqiponjës dykrenore të bëra me duar“, thuhet në deklaratën e prokurorit publik. I dyti u dënua me një vit me kusht dhe telefoni iu konfiskua.

Paraqitja e shqiponjës dykrenore në flamurin shqiptar shihet si provokim në Serbi, pasi shihet si simbol i doktrinës së “Shqipërisë së Madhe” dhe si mbështetje për shqiptarët e Kosovës, pavarësinë e të cilëve Beogradi nuk e ka njohur kurrë.