Policia gjermane ka arrestuar të enjten dy plaçkitës të një kamioni: Një shtetas 23-vjeçar maqedonas dhe një kosovar 37-vjeçar. Që të dy kanë qëndruar ilegalisht në Gjermani.
Ata kishin ardhur në Gjermani para disa muajsh pa viza të rregullta, kanë punuar pa leje të rregullt pune dhe pa sigurim të punës tek një pronar i kamionëve në kantieret në rrethinën e Neu-Ulmit. Pasi shefi nuk ua kishte paguar pagat e tyre të punës ilegale, ata ia kishin marrë kamionin në vlerë prej 7.500 eurosh si peng, shkruan „swp.de“, njofton „Shtegu.com“.
Më në fund, kamioni ishte gjetur të enjten rreth orës 08.00, ndërsa nga ora 10.00, plaçkitësit ishin arrestuar. Pas marrjes në pyetje nga prokuroria, që të dy janë urdhëruar që të largohen nga Gjermania. Ata i pret një procedurë penale, ndër të tjera, për shkak të plaçkitjes dhe punë ilegale. Nga ana tjetër, punëdhënësi 40-vjeçar do të duhet të përgjigjet për trafikim të të huajve, ndihmesë në qëndrimin ilegal të të huajve, si dhe angazhim të punëtorëve ilegalë.