FC Prishtina merr kreun e tabelës pas një loje si macja me miun

22:25:45                 2016-09-07

FC Prishtina nga Berna edhe një herë i ka gëzuar simpatizantët e saj, duke shënuar fitore në derbin për kreun e tabelës dhe duke mposhtur kundërshtarin FC Lerchenfeld, me rezultat 4:2.

Gjashtë gola janë shënuar në ndeshjen kundër FC Lerchenfeld, në praninë e shumë shikuesve. Pas kësaj fitoreje, debutuesi në Ligën e dytë interajonale, e ka marrë kreun e tabelës. Lerchenfeldi e filloi mirë ndeshjen duke shënuar herët për avancim 0:1, mirëpo vendësit iu përgjigjën me tre gola në pjesën e parë, që në fund të fitojnë 2:4.

Vlenë të theksohet se ekipit kundërshtar i mungonin disa lojtarë për shkak të lëndimeve, në mesin e të cilëve edhe Admir Selmani, ndërsa Prishtina tregoi një formë të lartë dhe taktikë të përsosur.

Pas një gabimi të portierit Alban Gjokaj, të cilit i pengoi dielli, Lerchenfeldi kaloi në epërsi përmes Miroslav Paniç, por kishte edhe dy rate të mira, të cilat nuk i realizuan Patrick Gerber dhe Edmund Lekaj.

Mysafirët u gjendën në situatë të palakmueshme në minutën 15`, kur për shkak të lëndimit Marco Ryter u zëvendësua nga Steven Baumer. Nga ana tjetër, portieri mysafir i dëshmoi cilësitë e veta, duke iu kundërvënë sulmeve të Bajram Avdiljit, Dardan Mehmetit dhe sulmuesit ultra të shpejtë, Hisham Emurlit.

Prishtina e filloi dominimin e plotë dhe në minutën 35` e barazoi rezultatin përmes Avdiljit. Vetëm tre minuta më vonë, Fitim Sadriji shënoi nga një gjuajtje e lirë nga 25 metra në këndin e majtë të lartë, ndërsa pak më vonë edhe Emurli u regjistrua në listën e golashënuesve, duke ngritur rezultatin në 3:1. Praktikisht, me këtë edhe u vulos fituesi i ndeshjes.

Pas pushimit, FC Prishtina kundër Lerchenfeldit lujati si macja me miun. Por, kjo ka mundur tu kushtojë shtrenjtë pasi boshnjaku Paniç, arriti të zvogëlojë epërsinë në 3:2. Lerchenfeldi filloi të ngazëllehet dhe gjithçka vendosi në sulm për të barazuar rezultatin. Mirëpo, në minutën 85`, Bujar Mehmeti që ishte futur në lojë kohë më parë, arriti të shënojë për rezultatin përfundimtar 4:2. Mysafirët përsëri u kërcënuan për t`i bërë vetëm një grim të vogël rezultatit, por kot.

Pas ndeshjes, trajneri mysafir i lavdëroi futbollistët e vet, por edhe deklaroi se ekipi i FC Prishtinës duhet marrë seriozisht, si një faktor i rëndësishëm për të ardhmen. „Tempoja e futbollit që e imponion FC Prishtina, krijon kënaqësi për ta shikuar“, ka pohuar trajneri Bruno Feller në një artikull për të përditshmen zvicerane „Berner Zeitung“, shkrim ky i përshtatur nga „Shtegu.com“.