Familja 11-anëtarëshe rome kthehet vullnetarisht në Kosovë

Një familje njëmbëdhjetanëtarëshe rome, pas refuzimit të aplikimit të tyre për azil dhe pas një dëbimi të dështuar, nga Thüringeni i Gjermanisë është larguar vullnetarisht për në Kosovë. Sipas autoriteteve gjermane, familja në fjalë ka marrë një ndihmë prej 2.800 eurosh, për të rifilluar jetën në Kosovë, ndërsa ndihma është organizuar nga Qeveria federale gjermane, krahinat federale dhe BE-ja. Për dhënien e këtyre mjeteve vendosë Organizata ndërkombëtare për migrim (IOM).

Familja është dashur të dëbohet nga Meiningeni për në Kosovë, nga mesi i muajit gusht të këtij viti. Por, autoritetet gjermane e prolonguan dëbimin e tyre, pasi një fëmijë 13-vjeçar i familjes ishte zhdukur. Sipas organeve komunale, përpos kësaj familjeje, gjatë ditëve të kaluara, edhe gjashtë azilkërkues të tjerë janë larguar vullnetarisht nga Gjermania, shkruan „mdr.de“ transmeton „Shtegu.com“.