Exclusive: Komisioni Evropian mohon « dokumentin », kërcënimet për sanksione ndaj Maqedonisë

Komisioni Evropian (KE) ekskluzivisht për „ZHURNAL“ i ka mohuar kategorikisht shkrimet e disa mediave në Maqedoni të cilat pretendojnë se posedojnë një „dokument“ në të cilin kinse institucioni ekzekutiv i Bashkimit Evropian ka kërcënuar me sanksione ndaj Maqedonisë për shkak të bllokadës së negociatave për zbatimin e Marrëveshjes së Przhinos.

Zëdhënësja e KE-së, Maja Kocijancic thotë se asgjë nuk ka të vërtetë nga këto shkrime.

«Ky është qartë një fabrikim », tha për Zhurnal.mk Kocijancic e lutur që të verifikoi raportimet e sotme të mediave vendore.

Mediat vendore kanë shkruar më herët dhe kanë paraqitur një « dokument » në të cilin kinse KE ka hartuar një listë sanksionesh ndaj Maqedonisë për shkak të dështimeve të deritashme midis partive në pushtet dhe atyre të opozitës lidhur me marreshjenë në fjalë.

Ndërkohë burimet të tjera të BE-së në Bruksel, duke e komentuar këtë kinse « dokument » thanë për Zhurnal se mënyra e të shkruarit e këtij « dokumenti » nuk është mënyrë e të shkruarit e KE-së.

Për më tepër po këto burime thanë se « nuk është Komisioni Evropian ai i cili propozon sanksione » por shërbimi i politikës së jashtme dhe të sigurisë së BE-së (EEAS) dhe vendet anëtare të bllokut evropian.

« Fabrikim i dobët », thanë këto burime perëndimore të BE-së në Bruksel.

Ekrem Krasniqi, Zhurnal.mk