Dëmtohen varrezat myslimane në Zvicër

Gjatë ditës së diel, në lagjen Montoie të Lozanës në Zvicër, janë dëmtuar varrezat e myslimanëve
Kryqe të vizatuar, lule të dëmtuara, gurëtë përmbysur. Gjatë të dielës janë dëmtuar dhjetëra varreza të myslimanëve në Lozanë të Zvicrës. „Autorët i kanë dëmtuar vetëm varrezat myslimane“, ka raportuar një lexues për të përditshmen zvicerane „20 Minutes“. Policia e Lozanës ka konfirmuar se autorët i kanë dëmtuar varrezat të cilat kanë qenë të shënuara me shkronja arabe. Ndaj këtij veprimi i cili vlerësohet si shkelje e paqes së të vdekurve, është hapur një kallëzim penal dhe hetimet kanë filluar menjëherë. Kryetari i Unionit të shoqatave myslimane, Pascal Gemperli ka shfaqur zemërimin dhe pakuptueshmërinë e tij ndaj këtij akti „i cili nuk i lë të qetë edhe të vdekurit“.