Në Shtëpinë e religjioneve në Bernë të Zvicrës, të dielën edhe zyrtarisht u bë hapja e xhamisë së re, në frymë festive. Edhe kësaj radhe, ajo u vizitua kryesisht nga burra, me prejardhje nga Kosova dhe Maqedonia. Në këtë manifestim, ishin të pranishëm edhe shumë mysafirë, siç ishin Gerda Hauck, kryetare shumëvjeçare e Shoqatës „Shtëpia e religjioneve – Dialog i kulturave“, e cila projektin e kishte udhëhequr në mënyrë paqësore, por me vështirësi të mëdha, apo Regula Mader e cila kishte dhënë angazimin e saj të madh për një fundament të majmë të këtij lloji të kulturave të ndryshëm. Nuk mungoi edhe këshilltarja „e gjelbër“ zvicerane Franziska Teuscher, e cila këtë ditë e vlerësoi si kundërpërgjigje e votimit për ndalimin e ndërtimit të minareve të xhamive të vitit 2009. Ajo i shpalosi kujtimet e së kaluarës kur i kishte parë besimtarët myslimanë duke u lutur në një bodrum të errët. Qendra e re islame tashmë është e ndritshme, e madhe, e zbukuruar me shkronja arabe dhe stoli të ndryshme kolorite. Papritmas, edhe një zonjë e rrallë ishte paraqitur në ftesën që ia kishte bërë xhamia. Ishte kjo ambasadorja amerikane në Bernë, Suzan LeVine. Sikur edhe të tjerët, edhe ajo e kishte pranuar një ftesë për të qenë e pranishme dhe projekti i kishte pëlqyer aq shumë sa që këtë diversitet vlerash të kulturave të ndryshme kishte dashur ta shohë me sytë e saj. Shoqatat islamike nga Maqedonia dhe Kosova shprehën fjalë mikpritëse për të gjithë të pranishmit, ndërsa më pas, fjalën e mori edhe „mikpritësi“ i xhamisë, imami Mustafa Memeti, i cili nuk e ka shprehi të lexojë fjalimin e tij nga letra e shkruar. Ai vjen nga Lugina e Preshevës dhe nga një gazetë zvicerane ishte zgjedhur si „zvicerani i vitit“. Sipas tij, „Një religjion duhet të pasqyrojë gëzimin, paqen dhe harmoninë midis njerëzve“. Pas përfundimit të manifestimit qendror, ambasadorja amerikane u trajtua si një yll i vërtetë, duke ju mundësuar të pranishmëve që të fotografoheshin me te. Mysafirët u pritën edhe me ushqime të ndryshme të përgatitura vullnetarisht nga anëtarë të xhamisë.