Zyrtare: Serbi i dehur shoqëron në vdekje katër zviceranët

35 Lexime

Turisiti serb në Zvicër, Nikola I. (38) ishte vozitësi i cili shkaktoi aksidentin e javës së kaluar me pesë viktima në Rheinfelden të Zvicrës: Ai ka qenë duke e drejtuar veturën „VW Golf“ natën e së shtunës, kur vetura doli nga rruga dhe u dogj e tëra. Pesë meshkuj e humbën jetën, duke u karbonizuar tërësisht, ndërsa dy gra e mbijetuan aksidentin me lëndime të rënda.
E pabesueshme: Vozitësi i Golfit në gjak ka pasur mbi 1,3 promila alkool, ka bërë të ditur gjatë të enjtes Prokuroria shtetërore e Aargaut. Edhe viktimat e tjera kanë pasur nivel të ngjashëm të promilave të alkoolit. Nikola I. nuk ishte për herë të parë në Rheinfelden, pasi ai rregullisht e vizitonte të afërmin e tij në Aargau, Sascha M. (43), pronarin e veturës Golf.
Kësaj radhe, serbi e kishte marrë me vete në Zvicër edhe t`ëmën. Arsyeja: Vetëm para pak javësh, atij i kishte vdekur babai. Çfarë tragjedie për vejushën serbe: Brenda disa javësh, ajo jo vetëm që e humbë burrin, por edhe djalin, shkruan „Blick“, transmeton „Shtegu.com“.
Përndryshe, pronari i veturës Sascha M. ka pasur fat në fatkeqësi. Natën e kobshme, ai e kishte ndjerë veten të lodhur dhe kishte shkuar në shtëpi në këmbë, duke ua lënë veturën miqve të tij. Hetimet kanë treguar se gjatë aksidentit, njëra prej të lënduarave rëndë, një 34-vjeçare, kishte arritur ta tërheqë nga zjarri shoqen e saj 24-vjeçare, duke i shpëtuar jetën.