E detyruar të largohet nga Zvicra në vitin 2013, një nënë kosovare mund t`i bashkohet vajzës së saj shtatëvjeçare. Kështu ka vendosur Gjykata federale zvicerane lidhur me vendimin e autoriteteve të Kantonit Valis, për ta dëbuar kosovaren.
Autoritetet e Valisit kanë qenë shumë të ashpër lidhur me dëbimin e një shtetase kosovare në vitin 2013. Kjo nënë kosovare, e vendosur në Sion në periudhën prej 2001 deri 2004, më pas sërish nga viti 2007, ishte dëbuar nga territori i Zvicrës, pasi i ishte anuluar leja e rregullt e qëndrimit pas ndarjes. Në një vendim të shqiptuar në fillim të kësaj jave, Gjykata federale zvicerane ka theksuar se ky vendim ka qenë „tepër restriktiv“, dhe se nëna e re 26-vjeçare kosovare mund të kthehet në Zvicër.
Në vitin 2008, ajo kishte lindur një vajzë në Valis, nga një shtetas italian me vizë C. Pasojat e kësaj lindjeje: Babai e fiton të drejtën për përkujdesje të fëmijës, pasi kosovarja ka qenë pa dokumente të rregullta. Më pas, ajo parashtron kërkesë për të fituar azil, por kjo kërkesë i refuzohet, shkruan „20 Minutes“ frankofone, transmeton „Shtegu.com“. Ky veprim u cilësua si politikë migrimi joadekuate nga instanca më e lartë zvicerane. Aq më tepër, që kosovarja nuk ishte dënuar asnjëherë për çfarëdo qoftë delikti. „Interesi privat i kosovares për të banuar në Zvicër, në afërsi të vajzës së saj, si dhe interesi i vajzës që të ketë afër emocionalisht nënën e saj biologjike, është më i madh se interesi i politikës restriktive të migrimit“, kishin vendosur gjykatësit më të lartë zvicerane. Ata i kanë sugjeruar Entit zviceran të migrimit që ta pajisin kosovaren me lejeqëndrim të rregullt.
„Shpresoj se ky vendim i Gjykatës federale zvicerane do të na detyrojë të mendojmë më ndryshe lidhur me politikën e migrantëve, të cilët ndonjëherë gjenden në situata ekstreme“, ka deklaruar deputetja demokrishtere, Madeline Heiniger.