10:34:15 2016-10-16
Besnik Hasanaj jeton në Schönau të Gjermanisë me familjen e vet. Në momentin që policia gjermane mori masat për dëbimin e tyre, ndodhi një rast dramatik. Shqiptari 41-vjeçar ka pasur një lejeqëndrim të përkohshëm (duldung), një vend për profesionalizim të mëtutjeshëm dhe një kontratë për një banesë private në Schönau. Ai llogaritet si person i integruar mirë në shoqëri, fëmijët e tij 10-, dhe 14-vjeçar, flasin njësoj si prindërit e tyre shumë mirë gjuhën gjermane. Por për policinë gjerrmane kjo nuk ka luajtur shumë rol, pasi ndërmori masat për dëbimin e familjes shqiptare për në Shqipëri.
Para disa ditëve, policia gjermane ishte paraqitur në vendin e tij të punës për ta dëbuar familjen nga Gjermania. Me këtë rast, bashkëshortja e Besnikut ishte shtruar në një spital psikiatrik, pasi kishte tentuar t`i prejë venët e duarve, shkruante „Badische Zeitung“, njofton „Shtegu.com“. Qeveria lokale, e cila kishte urdhëruar dëbimin e familjes, në një komunikatë kishte shkruar: „Dëbimi i planifikuar për datën 26 gusht, ka dështuar pasi zonja Hasanaj është plagosur vetvetiu, duke ndërprerë dëbimin në aeroportin e Frankfurtit“.
Tashmë gjithçka ka përfunduar si është më së miri për familjen Hasanaj: Javën e kaluar, Besniku ka fituar lejen e aftësimit të profesionit të vet si autongjyrosës, në Bad Säckingen, ndërsa familja e vet mund të qëndrojë në Schönau, pas disa presioneve që anëtarët e Caritasit i kishin bërë organeve qeveritare.
