Presidenti Donald Trump tha se ai nuk është më banor i New Yorkut.
Lajmi u njoftua fillimisht nga gazeta “New York Times” dhe më pas u konfirmua nga vetë presidenti në një seri postimesh në Twitter të enjten vonë.
Ai shkruante se ka vendosur që vendbanimi i tij i përhershëm të jetë Palm Beach i Floridës.
“Pavarësisht nga fakti se paguaj me miliona dollarë taksa për qytetin dhe në nivel shteti çdo vit jam trajtuar shumë keq nga drejtuesit politikë të qytetit e shtetit të New Yorkut”, shkruante Trump.
Nuk është e qartë se sa është shuma e taksave që ka paguar Trumpi në New York, pasi ai ka refuzon të publikojë informacion mbi këtë çështje.
Guvernatori i New Yorkut, Andrew Cuomo nuk dukej i mërzitur rreth ndryshimit të adresës së banimit të Trumpit.
Ai e quante çlirim nga një barrë dhe shtonte: “Nuk është se zoti Trump i paguante taksat këtu gjithsesi. Florida është i gjithi i juaji” shkruante ai.
Në shtator Trumpi dhe bashkëshortja e tij Melania paraqitën dokumente të veçanta vendbanimi në gjykatën e qarkut të kontesë së Palm Beach-it për të ndryshuar vendbanimin e tyre.
Sipas rrjetit televiziv NBC Presidenti Trump ka qenë në Mar-a-Lago, rezidenca e tij në Palm Beach, 99 ditë që nga momenti që mori detyrën. Ai ka vizituar klubin e tij të golfit në New Jersey 90 ditë dhe ka shpenzuar vetëm 20 ditë në kullën Trump që ndodhet në qytetin e New Yorkut.
Vëzhguesit besojnë se lëvizja e presidentit nga New Yorku në Florida ka të ngjarë të jetë pjesërisht e motivuar nga një sistem taksash më të ulëta që zbaton shteti në juglindje të vendit.