Ministri i Tregtisë dhe Industrisë, Endrit Shala i bënë edhe një paralajmërim ministrit të Ekonomisë të vendit tonë Kreshnik Bekteshit. Këtë here Shala i dërgon një letër zyrtare Bekteshit, me çka i kërkon që Maqedonia e Veriut, të largojë barrierat e vendosura ndaj produkteve kosovare, sepse përndryshe siç thotë ai do të vendosin masa reciprociteti për të gjitha prodhimet e Maqedonisë së Veriut që eksportohen në Kosovë.
Letrën Shala e ka publikuar edhe në profilin e tij në facebook, ku mes tjerash thuhet se vendimi ka hyrë në fuqi nga data 01.06.2019 me të cilin ndalohet importi i peshkut të gjallë që dedikohet për rritje ose mbushjen e hurdhave me peshq të vegjël me prejardhje nga Republika e Kosovës. Poashtu është vendosur edhe një taksë prej afër 700 euro në çdo hyrje të kamionëve të peshkut në Maqedoninë e Veriut. Ai tregon se këtë problem që daton prej rreth dy muajsh e kanë drejtuar në adresa të ndryshme, por nuk kanë gjetur asnjë zgjidhje.
Endrit Shala, Ministri i Tregtisë dhe Industrisë
“Fillimisht çështja është adresuar te Komuniteti Nacional për Lehtësimin e Tregtisë së Maqedonisë së Veriut më datë 26 qershor, pastaj në takimin e Pikave të Kontaktit të CEFTA-s në Vlorë më datë 27, në data-bazën e CEFTA-s për raportim të barrierave më datë 1 korrik dhe në fund disa shkëmbime të email-ave në mes të zyrtarëve respektiv, por fatkeqësisht deri tani nuk është gjetur zgjidhje”.
Më tej ministri kosovar kishte theksuar rëndësinë e të bërit tregti pa barriera në mes të dyja vendeve dhe obligimet që ato i kanë ndërmarrë në kuadër të Marrëveshjes së CEFTA-s. Këto shkelje nga Maqedonia e Veriut për angazhimet e saj në CEFTA sipas tij, përbjënë një shqetësim të madh për Qeverinë e Kosovës.
Ministri Shala edhe para disa ditësh e paralajmëroi Maqedoninë e Veriut, duke thënë se uron të ketë një përgjigje nga Ministria e Ekonomisë së vendit tonë, mirëpo si duket nuk arriti të marrë përgjigje.
Ndërkaq, dikasteri i Ekonomisë deri tani nuk ka dhënë asnjë prononcim lidhur me këtë çështje. Televizioni Shenja kontaktoi disa herë këtë ministri, por nuk arriti të marrë asnjë qëndrim prej tyre./Shenja