20:28:40 2016-09-05
Një video muzikore, në të cilën një i ri me prejadhje nga Kosova e ofendon policinë e Lucernit në Zvicër, ka zgjuar kërshërinë e Prokurorisë e cila i ka filluar hetimet
Në videon e tij, policët ai i ofendon duke i quajtur „qyqarë“ apo „shoqatë e bijëve të bushtrës“. Kosovari 19-vjeçar nga Lucerni, ka incizuar një video muzikore në të cilën këndon për dhunë kundër forcave të rendit. „Unë u përpoqa me ju dhe të gjithëve u dërgova në spital“, ka kënduar kosovari, i cili përpos që tregon veturën e tij me autotarga të Lucernit, shpeshëherë e tregon edhe gishtin e tij të mesëm.
Deri më tani, videoja është klikuar rreth dhjetë mijë herë. Për policinë, ky person është i njohur edhe më herët, ndërsa në këngë e ka kërcënuar prokurorin me thikë për t`i asgjësuar aktet e tij.
„Prokuroria e Lucernit ka njohuri për videon dhe ka filluar hetimet“, ka deklaruar zëdhënësi i saj, Simon Kopp për „Neue Luzerner Zeitung“, njofton „Shtegu.com“. Nga ana tjetër, këngëtarit i cili veten e quan Gabu, nuk i ka bërë shumë përshtypje fillimi i hetimeve ndaj tij, pasi ai vetëm ka kënduar dhe askush nuk duhet ta marrë personalisht.
Në video mund të vërehen dy flamuj: Njëri i Partisë së Punës së Kurdistanit dhe një tjetër e Abdullah Öcalanit. Sipas avokatit zviceran, Urs Rudolf, në video duhet të shqyrtohen disa çështje: Dhuna dhe kërcënimi ndaj forcave të rendit, diskriminimi racor, shpifje, nxitje publike për krim dhe dhunë, propagandë për një organizatë terroriste dhe shkelje e Ligjit të armëmbajtjes.