PËRBINDËSHI I SHPIRTIT TONË

Shkelzen Halimi

Besimtarët e devotshëm janë njerëz që rrezatojnë mirësi, paqe dhe drejtësi, janë të përmbajtur nga gjërat e ndaluara, duke qëndruar brenda kufijve që ia përcakton ligji i Zotit. Sot, fatkeqësisht, ata janë të paktë, ndaj dhe nevoja për individë të tillë të dobishëm për shoqërinë në rrethanat aktuale bëhet më shumë se domosdoshmëri. Demokracia e brishtë, të cilët shqiptarët e kuptuan si një miks të vetëqeverisjes dhe anarkisë, bëri që të shtohet numri i abuzuesve me të gjitha vlerat që e dallojnë një komb: me kulturën, historinë, gjuhën, por edhe me fenë. Përditshmëria, ngado që sillemi, na dëshmon se midis nesh është një armatë e madhe që janë të devotshëm ndaj Zotit, por njëkohësisht janë shumë të devotshëm edhe ndaj liderëve partiakë, gradacioni i të cilëve në adhurimin e tyre thjeshtë i kalon përmasat e normales. Dhe krejt kjo për të arritur një synim të caktuar material. Zoti është i përjetshëm dhe i plotfuqishëm, kurse liderët të përkohshëm: shkojnë, vijnë dhe harrohen. Shtrohet pyetja: cilin lloj të përbindëshit e ushqejmë brenda nesh që abuzon kaq shumë në emër të shpirtit tonë?