I humbë prindërit në kufirin serbo-maqedonas, niset i vetëm për Gjermani
Në këmbë deri në Iran, me anije nëpër Detin Egje, për në Gjermani. E përditshmja amerikane „New York Times“, në Passau të Gjermanisë ka takuar shtatëvjeçarin Reza, i cili në Ballkan i kishte humbur prindërit dhe në Gjermani kishte ardhur i vetëm.
Në Passau të Gjermanisë, „New York Times“ ka takuar njërin nga të ardhurit më të rëndësishëm në Gjermani, Reza Mohammadi – një shtatëvjeçar nga Afganistani, i cili prindërit e tij i kishte humbur diku në „Itinerarin ballkanik“, duke arritur në Bavari të Gjermanisë i vetmuar, në këmbë.
Ishte një natë me shi në kufirin serbo-maqedonas, kur papritmas fëmija kishte vërejtur se familja e tij (dy prindërit dhe dy motra) nuk gjendeshin prapa tij. Reza ishte ulur nënjë trung dhe kishte pritur. Mandej, një njeri e kishte pyetur se cfarë po bënte ai aty, pasi policia kishte arrestuar disa familje. Ai e mori fëmijën në krahë dhe që të dy e kaluan kufirin, njofton „Shtegu.com“. Kështu i kishte rrëfyer Reza të përditshmes amerikane, duke shtuar se si atij ia kishin vjedhur disa të holla që e ëma ia kishte dhënë për ndonjë rast urgjent, se si i kishte parë policët duke ndjekur fëmijë të tjerë dhe si i kishte gjetur përsëri prindërit, të cilët tashmë janë në Iran.
Tashmë një vit të plotë, vogëlushi Reza është duke qëndruar në Gjermani. Arratisja e tij, atë dhe familjen e tij e kishte shoqëruar duke kaluar nëpër Iran e deri në Turqi. Atje, ata kishin hipur në një anije, në drejtim të Greqisë, ndërsa ishin shpëtuar nga rojet e bregdetit, duke vazhduar rrugën për në Gjermani. Kur kishte arritur në Passau, ai kishte pyetur nëse kjo është Gjermania, e më pas kishte dashur të thërrasë t`ëmën. Ishte kjo dita e 29 dhjetorit të vitit të kaluar. Që atëherë, ai është duke jetuar në një qendër strehimore, e cila është nën përkujdesje të murgeshave katolike, ndërsa Reza tani flet rrjedhshëm gjuhën gjermane. Ai banon së bashku me një fëmijë gjerman dhe e vijon shkollimin e rregullt. „Është një nxënës i mirë. Tani më gjerman se disa gjermanë“, kishte deklaruar mësuesi i tij.