Një kosovar e kishte trafikuar një celular në çelinë e tij në një burg të Zvicrës. Vëzhgimi i telefonatave ka dëshmuar se në këtë burg ka pasur edhe celularë të tjerë. Këshilltari kantonal Urs Martin e ka aktualizuar çështjen si problem të rëndë.
Një i burgosur kosovar e kishte trafikuar një celular në çelinë e tij, duke dirigjuar nga burgu i Frauenfeldit në Zvicër delikte të tjera. Kosovari nga burgu kishte telefonuar plotë 165 herë. Një seancë gjyqësore e Gjykatës rajonale në Weinfelden i kishte zbardhur këto biseda telefonike. „Kam përshtypjen se burgu i Thurgaut është duke funksionuar si është më së keqi“, ka deklaruar këshilltari kantonal Urs Martin, për „Tagblatt“, transmeton „Shtegu.com“. Pas shumë polemikave, tashmë janë zbardhur bisedat e palejuara telefonike përmes celularëve nga burgu në Thurgau. Urs Martin ka dashur të dijë se si ka mundur të ndodhë një gjë e tillë. Për këtë, ai i ka dorëzuar një interpelancë autoriteteve vendore.
Në përgjigjen e saj, qeveria rajonale ka deklaruar se kosovari nuk kishte telefonuar nga burgu vetëm për qejf. Falë një informate të një personi anonim, Prokuroria e kishte zbuluar rastin e celularit. Krejt kjo kishte ndodhur në mars të vitit 2013, ndërsa numri i kosovarit ishte përgjuar rregullisht. Në burgun e lartpërmendur ka pasur edhe celularë të tjerë, të cilët gjithashtu janë përgjuar dhe është arritur të pengohet një plaçkitje, thuhet në përgjigjen që e kishte kthyer qeveria rajonale. Për shkak të arsyeve taktike, celularët nuk ishin konfiskuar menjëherë.
„Ky është vetëm një justifikim“, vazhdon Urs Martin, i cili është i mendimit se autoritetet i kanë zbuluar celularët vetëm rastësisht. „Kjo është vetëm një përpjekje e sinçertë për të shkruar bukur ankesat“, shton këshilltari kantonal i SVP-së. Sipas tij, burgu në fjalë ka probleme në udhëheqësi dhe urgjentisht duhet ndryshuar diçka. „Ndokush tjetër duhet ta marrë përsipër“, pohon Martin.
Rasti i kosovarit i ka vetëdijësuar burgjet nëpër tërë Zvicrën në shtimin e kontrollit të celularëve të trafikuar. Por, në shkrimin e qeverisë rajonale thuhet se një gjë e tillë është gjithnjë më e pamundur pasi celularët po prodhohen gjithnjë e më të vegjël.
Në përgjithësi, celularët nëpër burgjet e Zvicrës janë të ndaluar. Vetëm pas një kohe të caktuar, disa të burgosurve u është e lejuar që të flasin me telefonat e instaluar nëpër burgje.