Komiteti Olimpik i Maqedonisë uron Jasin Rexhallarin

Mundësi tashmë i njohur shqiptar nga Maqedonia, Jasin Rexhallari (61kg) u eliminua nga gara e mëtutjeshme në Lojërat e para Evropiane në Baku të Azarbejxhanit, ndërsa të shtunën do të kthehet për në Maqedoni, së bashku me mundësit e tjerë.
Reprezentuesi i Maqedonisë thotë se ka pritur më shumë, por edhe me kualifikimin e ndër tetë më të mirëve është i kënaqur.
“Mendoj se duhet të jem i kënaqur me paraqitjen time në Baku. Shënova fitore nga mundësi polak, nga i cili vitin e kaluar pata humbur, ndërsa bullgari është një mundës shumë me përvojë, është kampion bote dhe I treti në Olimpiadë. Kuptohet kam pritur më shumë, por edhe këtë vit jam në mesin e tëtë më të mirëve në Europë”, ka deklaruar për gazetën “Lajm”, Rexhallari nga Baku.
Në vitin 2016, atë e presin dy aktivitete të mëdha, Evropiani në Letoni dhe Olimpiada në Rio.
“Shpresoj se vitin e ardhshëm do të rrëmbej ndonjë medalje nga kampionati evropian në Letoni dhe lojërat olimpike në Rio de Janeiro”, theksoi Rexhallari.
Kujtojmë se, Jasin Rexhallari pësoi humbje me rezultat 3-1 nga bullgari Radoslav Velikov, në çerekfinale, ndërsa në raundinë e parë shënoi fitore ndaj polakut Krzysztof Bienkowski me rezultat 5-4 me pikë.
Nga ana tjetër, Komiteti Olimpik i Maqedonisë, në një pronocim të tij, ka shkruar: Mundësi nga Maqedonia, Jasin Rexhallari, në një duel mjaft të mundimshëm e të rëndë, ka mposhtur mundësin polak Krishtof Bienkovski, me rezultat 5:4, përpos faktit se ishte në negativë prej 2:0 dhe 4:2. Por, i udhëhequr nga seleksionuesi Vrenezi, ai mblodhi fuqi dhe e mposhti kundërshtarin e papërshtatshëm dhe të fortë nga Polonia.
Në radhë ishte dueli me kampionin botëror dhe evropian Radosllav Velikov nga Bullgaria, i cili pas një betejë të rëndë, e mundi Jasinin me rezultat 3:1. Rexhallari tregoi luftë të fortë e të shkëlqyeshme, por prapëseprapë, lodhja nga dueli i mëparshëm e kishte bërë të veten. „Urimet tona më të përzemërta për Jasinin, për duelet e shkëlqyeshme dhe besojmë fortë në rezultatet e tij sportive edhe më të suksesshme“, përfundon urimi nga Komiteti olimpik për Jasin Rexhallarin.