Një vit pas shkurorëzimit nga princi Charles, më 1 korrik 1997, princesha Diana e festoi ditëlindjen e saj të fundit. Në mëngjesin e ditëlindjes atë e prisnin lule, ndërsa shumë shpejt i telefonoi edhe i biri, princi Harry, i cili ia këndoi „Happy birthday“. Në mbrëmje atë po e priste ahengu humanitar gala në „Tate Gallery“, në të cilin ajo ishte e ftuara e nderit. Meqenëse gjithmonë i zgjidhte veshjet për ngjarje të ndryshme në mënyrë të përkryer, përjashtim nuk ishte edhe 100-vjetori i „Tate Gallery“ në Londër, shkruan KOHA Ditore. Ajo shkëlqeu në një fustan të gjatë të zi të cilin e dizajnoi posaçërisht për të si dhuratë për ditëlindje Jacques Azagury. Ajo e plotësoi atë me një qafore smeraldi dhe diamant dhe me një palë vathë të ngjashëm, një set ky i cili dikur i përkiste mbretëreshës, ndërsa në kohën e vet e kishte bartur edhe gjyshja e saj. Siç shkruan revista britanike „Hello“, ndryshimi i veshjes së princeshës ndodhi në momentin e fundit, sepse fustanin si dhuratë për ditëlindje e mori të njëjtin mëngjes kur edhe e festoi.
“Dianës i pëlqeu menjëherë, mendoj se më herët kishte planifikuar të vishte diçka tjetër, por në fund e ndryshoi mendjen dhe e veshi fustanin tim”, – tha Azagury, duke shtuar: “Ishte e lumtur si kurrë më parë, kishte diçka në mënyrën se si ajo e mbante personalitetin e saj, sikur e kishte gjetur ndonjë vetëbesim të ri”.
Edhe pse më zyrtarisht nuk ishte anëtare e familjes mbretërore, ajo për të gjithë mbeti princeshë, adhuronte të vishte rroba me ngjyrë të zezë, ngjyrë kjo të cilën më së shumti e bartin në varrime. Por asaj i rrinte mirë. Fustani për ditëlindjen e fundit është konfirmimi më i mirë i kësaj. Ajo vdiq vetëm dy muaj pasi e kishte veshur atë, më 31 gusht 1997.