Një kosovar me vendbanim në Zvicër, në vendlindje kishte pësuar aksident me veturë. Sigurimi Helvetia ia kishte refuzuar kërkesat e tij për dëmshpërblim, ndërsa Gjykata federale zvicerane e ka arsyetuar vendimin e sigurimit si të drejtë
Sigurimi vlen vetëm për ato zona të Serbisë, të cilat kontrollohen nga Qeveria serbe. Ky udhëzim i paraqitur në kartën e gjelbër të sigurimit, sipas Gjykatës federale, mjafton që të siguruarit t`ia bëjë të qartë se për aksidentet në Kosovë nuk ka mbulesë të dëmeve.
Kështu pra, Gjykata federale e Lozanës, e ka refuzuar ankesën e kosovarit me vendbanim në Zvicër, i cili në vitin 2007 me veturën e vjehrrit kishte pësuar aksident në Kosovë
Personi në fjalë, aktualisht është paraplegjik dhe merr një pension invalidor e shtesa të tjera plotësuese. Nga sigurimi transit, i cili gjatë hyrjes në Kosovë nuk vlen, ai kishte pranuar 90.000 franga zvicerane, ndërsa nga arka e sigurimit pensional, 42.000 franga.
Nga sigurimi Helvetia, në të cilin ishte e siguruar vetura, ai ka kërkuar edhe 54.000 franga të tjera, duke argumentuar se në kartën e gjelbër të sigurimit nuk është e q artë nëse vlen sigurimi edhe në Kosovë.
Në atë kohë ekzistonte shteti serbo-malazez, i cili aktualisht nuk gjendet në kartën e sigurimit, pasi Mali Zi u nda nga Serbia. Por në kartën e sigurimit, Serbia e Mali Zi nuk janë fshirë, që do të thotë se sigurimi vlen për këto dy vende. /20 Minuten/