Vjen edhe një sukses i radhës i ekipi shqiptar FC Prishtina nga Berna, i cili ka mahnitur zviceranët me sukseset e tij në Ligën e dytë regjionale të Kantonit të Bernës, kësaj radhe duke mposhtur ekipin serb FK Sloga nga Biel Bienne me rezultat të thellë 4:0.
Nuk është dashur të pritet shumë kohë që FC Prishtina të kalojë në epërsi me golin e Hisham Emurlit në minutën 9` të takimit, ndërsa për golin e dytë u përkujdes Durim Seipi në minutën 22`. Ky ishte edhe rezultati i pjesës së parë të takimit, ndërsa në minutën 70` vendësit e shtuan avantazhin përmes golashënuesit më të mirë, Bujar Mehmetit. Kur të gjithë të pranishmit prisnin përfundimin e ndeshjes me këtë rezultat, Bajram Avdilji në minutën 90` shënoi për të vulosur fitoren e thellë e të merituar të FC Prishtinës me rezultat 4:0. Ishte kjo një ndeshje shumë e vlefshme për futbollistët shqiptarë, pasi me këtë fitore, ata morën kreun e tabelës si lider i Ligës së dytë rajonale dhe me gjasa reale për tu ngjitur një rang më lartë.