13:15:12 2019-08-29
Një histori emocionuese ka aterruar në redaksinë e Shtegu.com, që ka të bëjë me mikpritjen shqiptare të banorëve të Maqedonisë së Veriut, për vëllezërit e tyre nga Kosova. Bashkatdhetari Fatmir Shabani, nga fshati Gaçkë i Komunës së Ferizajt, tashmë disa vite punon dhe jeton në rrethinën e Cyrihut në Zvicër.
Për te është bërë traditë që gjatë kohës së pushimeve verore, domosdoshmërisht të vizitojë edhe lagjen Vizbeg të Shkupit. Më saktësisht, Fatmiri asnjëherë nuk mund t`i harrojnë momentet më të vështira të jetës, gjatë luftës në Kosovë, kur okupatori serb po asgjësonte gjithçka shqiptare nga këto troje, duke i detyruar me mijëra e mijëra familje të zhvendoseshin nga trojet e tyre.
Edhe Fatmiri me xhaxhain e vet u detyruan të largohen nga vendlindja nën tytat e automatikëve. Si shumica e shqiptarëve të Maqedonisë së Veriut, kësaj familje strehim i ofroi Hamdi Bislimi nga lagja Vizbeg e Shkupit.
„Më duket sikur kur nipi shkon te dajtë“, shprehet Fatmiri i lumtur enkas për Shtegu.com, gjatë vizitës së tij tek familja e Arifit. „Asnjëherë nuk mund t`i harroj të mirat dhe mikpritjen që na e ofruan, respektin që kanë për ne“.
Ndërsa Arifi, njëri nga tre djemtë fisnikë e zemërgjerë të Hamdiut, edhe më tej këmbëngul: „Kjo është shtëpia yte, kur të kesh kohë dhe kur të jesh këndej, derën e ke hapur“.
«Mendoj se të njëjtën gjë do ta kishin bërë edhe Fatmiri dhe xhaxhai i vet, për çdo shqiptar nga do qoftë ai», pohon me modesti Arifi, i cili fillimisht ka vijuar fakultetin pedagogjik, ndërsa është i puënsuar në ndërmarrjen «Higjiena komunale», në Shkup.
Arifi është i lindur në Shkup, me prejardhje është nga fshati Biti e Epërme i Komunës Shtërpc. Shkollën fillore dhe të mesme i ka kryer ne Shkup, kurse fakultetin e filloi duke i dhënë disa provime të vitit të parë, ndërsa për shkak të provokimeve të profesorëve maqedonas, në kohën kur shqiptarët etiketoheshin me «nacionalistë e irredentistë, Arifi i ndërpreu studimet, duke u punësuar në ndërmarrjen higjienike, ku aktualisht është duke ushtruar profesionin e shefit të mirmbajtjes së mekanizimit. Arifi është i martuar dhe prind I lumtur I katër fëmijëve.
