Kryeqyteti zviceran ka lumin më të pastër në botë, por nuk bën të pihet uji i tij

11:44:37           2019-08-29

Uji i lumit Aare në Bernë të Zvicrës, është jashtëzakonisht i pastër dhe ka një ngjyrë të këndshme. Megjithatë, nuk duhet të pini ujë nga lumi.

Aare është shumë i njohur për turistët për ngjyrën e tij bruz. Sidomos në Tripadvisor, lumi ka marr shumë nota të mira. Por, ngjyra e bukur sjell edhe deri në kontradikta nëse uji i tij mund të pihet.

Pra, në shumë komente të ndryshëm thuhet se uji është aq i pastër sa që mund të pihet. Një myasfir nga Britania e Madhe, në një forum të mërgimtarëve ka shkruar se Berna është qyteti i vetëm në botë që ka një lum, ku mund të notosh dhe të pish ujë.

Natyrisht se nuk është kështu, shkruajnë mediat zvicerane, përcjell Shtegu.com. Asnjërit nga banorët e Bernës nuk do t`i shkonte në mendje të pintë ujë drejtpërdrejt nga Aare. Megjithëse një person në Bernë konsumon rreth 175 litra ujë në ditë, ai kryesisht shfrytëzohet nga uji nëntokësor i zonës grumbulluese të ujit në Emmental dhe në Luginën e Aare.

Sipas ekspertit dhe mjekut Beat Staub, megjithëse uji i Aare është me cilësi të shkëlqyeshme, kjo nuk do të thotë se mund të pihet. „Për t`u konsideruar të sigurt, asnjë mikrob fekal nuk duhet të jetë i pranishëm në ujë. Ekzistojnë baktere koliforme në Aare”. Sidoqoftë, një gëllënkë uji nuk ju sëmurë.

Një laborator në Bern kontrollon vazhdimisht cilësinë e ujit të lumit. Rezultatet më pas transmetohen në Zyrën Federale për Mjedis dhe Agjencinë Europiane të Mjedisit. Me këtë rast, pranohen certifikata të shkëlqyeshme për cilësinë e ujit të Aare.

Sidoqoftë, cilësia e ujit mund të ndryshojë në varësi të rrethanave. Për shembull, pas ndonjë stuhie mund të gjenden më shumë baktere fekale në lum sesa zakonisht. Kjo ndodhë për shkak se impiantet e pastrimit kanë vetëm një kapacitet të kufizuar. Nëse shkaktohen reshje të mëdha shiu, disa nga ujërat e zeza futen në lumë. „Kur Aare merr ngjyrë kafeje, nuk këshillohet as të notohet, e lëre më të pish ujë“, thotë Staub.