Edita (Abdieski) Zahini përshëndetet me Jürgen Klopp

Këngëtarja tashmë e mirënjohur shqiptare me prejardhje nga Maqedonia e cila ka lindur në Bernë të Zvicrës dhe jeton në Köln të Gjermanisë, është e njohur si tifoze e flaktë e ekipit të Borussia nga Dortmundi. Me gjithë humbjen në finalen e Kupës së Gjermanisë, ajo nuk ka hequr dorë nga ekipi i zemrës, ndërsa në faqen e saj të Facebookut, ka postuar një foto përshëndetëse me idhullin e saj, trajnerin në largim të Dortmundit, Jürgen Klopp. „E gjeta rastin pasi e përfundoi fjalimin e tij, duke u larguar nga skena, i përlotur“, shkruan Edita. Përndryshe, ajo ishte kurorëzuar me çmimin e parë të shout “X Factor” në Gjermani, duke u cilësuar si një këngëtare shumë e mirë nga juria gjermane. Në një shou televiziv gjerman, Edita nuk kishte ngurruar të zbulojë se maqedonasit ia kishin shpifur mbiemrin e saj nga Zahini në Abdieski.