Arrestohet rastësisht shtetasi maqedonas në Zvicër

14:10:23                 2016-11-12

Policia kantonale e Cyrihut ka arrestuar një plaçkitës të dyshuar maqedonas. Ajo i ka rënë në gjurmë rastësisht shtetasit maqedonas, pas një kontrolli rutinë në komunikacion.

Pasditen e së enjtes, Policia kantonale e Cyrihut ka realizuar një kontroll të madh, duke hequr nga komunikacioni një shtetas maqedonas, pasi ka qenë duke vozitur pa patentë shoferi, shkruajnë mediet zvicerane, njofton „Shtegu.com“. Me rastin e bastisjes së veturës së tij, policia ka gjetur armë dhe një sasi të vogël të marihuanës.

Shtetasi maqedonas nga rrethina e Horgenit është arrestuar menjëherë. Në banesën e tij, hetuesit kanë gjetur një xhirovidë, e cila ishte vjedhur nga një plaçkitje e mëparshme. Sipas informatave të Policisë kantonale, shtetasi maqedonas ende nuk i ka pranuar veprat.