22:17:16 2016-11-11
Në Lyon të Francës, të enjten janë akuzuar tre persona të rrethinës Saint-Chamond (Loire), të dyshuar se kanë vrarë një shqiptar, për llogari të papastruara të kontrabandës me lëndë narkotike.
Më 09 qershor të këtij viti, kufoma e një shqiptari ishte gjetur në një hendek nga një këmbësor, në afërsi të lokacionit Lorette Loire.
Trupi i pajetë i shqiptarit rreth të tridhjetave, posedues i një pasaporte rumane, ka qenë i qëlluar me disa plumba, shkruan e përditshmja franceze „Le Parisien“, njofton „Shtegu.com“.
Vetura e tij e llojit „Mercedes“ është gjetur e djegur të njëjtën ditë në komunën fqinje Cellieu (Loire).
Tre të dyshuarit, të moshës 30-, deri 45, të njohur edhe paraprakisht nga policia franceze, për kontrabandë me lëndë narkotike, janë arrestuar të hënën në Loire, në kuadër të hetimeve të policisë gjyqësore.
Pas arrestimit të tyre, ata janë paraqitur para një Gjykate rajonale të specialzuar në Lyon.
Ata akuzohen për vrasje si bandë e organizuar, veprime të ndryshme kriminale dhe shkatërrimin e veturës.