20:47:35 2016-10-20
„Nuk dua myslimanë në banesë“ ka shkruar një qiradhënës në portalin e banesave „Immoscout24“ në ofertën e vet, të cilën e ka bërë publike gazeta e përditshme zvicerane „Nordwestschweiz“. I ballafaquar me kërkesën e qartë, ai ka spjeguar: „Myslimanët këndojnë disa herë në ditë në banesë, njësoj sikurse në xhami. Unë kam tashmë përvojë me ta, për ate edhe e kam shkruar ashtu“.
Por, ai nuk guxon të veprojë në këtë mënyrë, pasi bie ndesh me normat penale të racizmit, bëhet fjalë për një delikt zyrtar. „Mundësia e fillimit të hetimeve nga ana e Prokurorisë është e madhe. Shpallja publike nuk është joproblematike“, ka pohuar Marcel Niggli, profesori i të drejtës penale në Universitetin e Friburgut, përcjellë „Shtegu.com“.
Më tej, profesor Niggli vazhdon: „Duhet të bëhet dallim në mes të gjerave private dhe publike. Ai i cili dëshiron të japë një banesë me qira, në shpallje nuk guxon të potencojë racën, etninë apo fenë“.
Problemi i diskriminimit në tregun zviceran të banesave, është hulumtuar nga Universiteti i Bernës gjatë vitit 2014. Hulumtuesit kanë ardhur në përfundim se të interesuarit për banesa me emra të huaj, dukshëm kanë më pak gjasa se sa ofertuesit e njëjtë me emra zvicerane. Diskriminimi funksionon edhe pa shpallje ofenguese. Qiradhënësit mund ta gjejnë klinetin pa kurrfarë problemi duke u bazuar në saje të emrit.