Zvicër: Vdes vozitësi i autobusit pas një sherri banal

19:28:05           2016-07-16

Një zënkë banale ka përfunduar me vdekjen e një vozitësi të autobusit në Diablerets të Zvicrës. Pasi vozitësi i kishte trumbetuar disa herë, një person kishte hipur në autobus dhe e kishte sulmuar, pak më pas ai vdes.

 
Në Diablerets të Kantonit Vaud në Zvicër, pasditen e së premtes ka vdekur një vozitës i autobusit, pas një zënke banale, njoftojnë mediet zvicerane, transmeton „Shtegu.com“. Shkaku i zënkës ka qenë një veturë e parkuar në stacionin e autobusit në afërsi të stacionit të trenit në Aigle-Sepey-Diablerets, duke ia zënë vendin autobusit.

 
Vozitësi i cili ishte duke qarkulluar në këtë linjë, ka trumbetuar disa herë, ndërsa vetura është larguar. Por, si duket, trumbeta i kishte penguar zviceranit 49-vjeçar, i cili fillon ta ofendojë vozitësin e autobusit, një zviceran i moshës 59-vjeçare. Për një moment, ai largohet, por më pas kthehet duke hipur në autobus dhe duke e sulmuar fizikisht vozitësin e autobusit. Pasi largohet nga vendi i ngjarjes, vozitësi i autobusit e humbë vetëdijen dhe pak më vonë, para se të arrijnë ekipet e shpëtimit në vendngjarje, ai ndërron jetë. Përpjekja e personelit mjekësor për ta reanimuar ishte e kotë. Sulumuesi është arrestuar menjëherë, ndërsa Prokuroria zvicerane ka filluar hetimet për ndriçimin e plotë të rastit.