Aksident i tmerrshëm në Thônex afër Gjenevës: Një e moshuar doli nga rruga dhe u përplas me një grup fëmijësh. Dy nga fëmijët u plagosën rëndë. Vozitësja e plagosur rëndë ka ndërruar jetë më pas në spital
Një vozitëse 80-vjeçare ka goditur një grup fëmijësh në Thônex GE të shtunën në mëngjes, duke plagosur rëndë dy prej tyre. Vozitësja ndërroi jetë pak pasi u dërgua në spital. Këtë në mbrëmje e ka bërë të ditur prokuroria publike e Gjenevës, e cila ka konfirmuar informacione nga programi “Forum” në radio në perëndim të Zvicrës.
Aksidenti ka ndodhur pak pas orës 10:15, siç njoftoi prokuroria publike e Gjenevës këtë mëngjes, transmeton portali Shtegu. Vozitësja e moshuar synonte të kthehej në Park&Ride në qendrën sportive Sous-Moulin, njoftoi prokurori publik në një konferencë për shtyp në vend. Gruaja më pas gabimisht futi veturën në terrenin e qendrës sportive me një ritëm të shpejtë.
Aty 80-vjeçarja përplasi mjetin e saj me një grup fëmijësh që po merrnin pjesë në një kurs basketbolli. Fëmijët po dilnin nga palestra për të pirë një pije në momentin që u përplasën nga mjeti jashtë kontrollit. Nga katër fëmijët e goditur nga vetura, dy pesëvjeçarë kanë pësuar lëndime të rrezikshme për jetën, dy të tjerët kanë pësuar lëndime të lehta, tha zyra e prokurorit publik. I plagosur rëndë ka mbetur edhe drejtuesja e moshuar e mjetit, si dhe një tjetër i rritur që kishte shoqëruar fëmijët. Më vonë pensionistja vdiq në spital.
Shtatë fëmijë të tjerë dhe pesë të rritur morën kujdes psikologjik. Të gjithë të plagosurit u transportuan në Spitalin Universitar të Gjenevës. Përveç nëntë ambulancave dhe një helikopteri shpëtimi, u vendosën tetë policë dhe gjashtë automjete zjarrfikëse.
Ka nisur hetimi për zbardhjen e plotë të shkakut të aksidentit. Synohet të sqarohet sesi vozitësja ka kaluar një pengesë, ka përparuar një barrierë dhe ka kaluar një shesh përpara se të përplaset me derën e qendrës sportive.