Në një artikull të gjatë të javores „Migros Magazin“, është përshkruar puna e një atelieje zvicerane, e cila për qëllim ka që të rinjtë myslimanë t`i njoftojë më për së afërmi me rregullat e fesë Islame.
Bartja e shamisë, Ramazani, mjekkra, terrori: Të rinjtë nga Kantoni Thurgaut në Zvicër kanë pasur rast të mësojnë pak më tepër rreth fesë Islame. Me atelienë e tij, pedagogu social amerikano-zviceran Ron Halbright, është duke tentuar që t`i luftojë paragjykimet negative.
Të pranishëm në takim ishin pesë vajza e gjashtë djem të rinj të moshës 13 deri 16 vjeçare, të cilët fillimisht ishin paraqitur të përmbajtur. Por, pedagogu social, me çdo kusht kishte tentuar që të thyejë akullin, duke i pyetur nxënësit rreth jetesës në vend të huaj, marrëdhëniet me religjionin etj.
Nxënësja kosovare Yllhan (14) kishte një pyetje: „Ti je myslimane dhe ke një tatuazh. Kjo është haram, apo jo?“. Asaj iu përgjigjë udhëheqësja e kursit, Nuran Sherifi (35), myslimane shiite, shqiptare nga Maqedonia. Ajo ka pohuar se lidhur me këtë temë ka hulumtuar shumë dhe ekpertët nuk janë domosdoshmërisht të një mendimi. „Po, e vërtetë, tatuazhi është haram, por nuk është aq mëkat i rëndë“, i është përgjigjur Yllhanes së re.