15:35:50 2017-01-03
Në Kantonin zviceran Appenzell Ausserrhoden, gjatë një bastisje të një shtëpie, mëngjesin e sotëm janë dëgjuar të shtëna armësh. Me këtë rast janë plagosur dy policë, njëri ndër të cilët është në gjendje kritike. Autori i sulmit është lokalizuar dhe tashmë policia zvicerane është duke negocuar me te. Ai mund të jetë i rrezikshëm.
Për momentin, në fshatin Rehetobel AR të Zvicrës është duke u zhvilluar një aksion i madh policor, thuhet në një informatë të „FM1 Today“, përcjellë „Shtegu.com“. Rreth orës nëntë të mëngjesit, një person 33-vjeçar ka hapur zjarr ndaj policisë gjatë një bastisje të një shtëpie, saktëson Policia kantonale e Appenzell Ausserrhoden.
Dy policë kanë pësuar plagë të papërcaktuara. „Tridhjetetrevjeçari është arratisur në këmbë“, ka pohuar për „Blick“ zëdhënësi i policisë, Hanspeter Saxer. Ai është vlerësuar si i rrezikshëm dhe dyshohet se është i armatosur. Për kapjen e tij janë angazhuar edhe qenë policorë.
Rreth mesditës, hetuesit kanë arritur ta lokalizojnë sulmuesin, por jo edhe ta arrestojnë. „Kemi kontakte me sulmuesin dhe jemi duke negocuar me te“; vazhdon më tej Saxer. „Po përpiqemi që ngjarja të përfundojë pa gjakderdhje“.
Për t`i qetësuar banorët e rrethinës, policia ka theksuar se nuk bëhet fjalë për ndonjë sulm terrorist dhe se nuk ekziston rreziku për banorët. Vendgjarja është rrethuar nga forca të shumta policore.
Policët e plagosur, në ndërkohë janë transportuar në spital me helikopter dhe që të dy janë operuar. Njëri nga ta është në gjendje kritike.