14:04:41 2016-01-15
Gjykata rajonale e Bernës, ka shqiptuar vendimin e saj lidhur me një zënkë të shtetasve maqedonas në Zollikofen të Zvicrës, që ishte shkaktuar më 5 dhjetor 2014, me argumentimin se bëhet fjalë për një zënkë me motive banale.
Njëri nga të dyshuarit është dënuar me 5,5 vite burg, ndërsa një tjetër, me 7 vite. Që të dy, viktimës do të duhet t`i paguajnë nga 2.000 gjegjësisht 1.000 franga dëmshpërblim.
Dy të dënuarit kryesorë janë shtetas të Maqedonisë, ende të moshës nën tridhjetvjeçare dhe të njohur edhe më parë për organet e policisë. Sipas akuzës, njëri nga ta kishte udhëtuar shpeshëherë në Zvicër, përkundër ndalesës për të qëndruar në territorin zviceran.
Një person, i cili sipas aktakuzës ka qenë i afërt me të gjithë personat, ka dashur të ndërmjetësojë duke organizuar një takim me katër persona. Pas takimit të tyre, shumë shpejt kishte ndodhur një mosmarrëveshje e cila kishte eskaluar. Gjatë kësaj, disa nga personat kishin filluar me të shtëna duke u plagosur njëri me tjetrin.
Rasti ishte bërë i njohur si „Të shtënat misterioze nga Zollikofeni“ pasi, kur policia kishte arritur në vendin e ngjarjes, nuk kishte takuar asnjë pjesëmarrës të zënkës, ndërsa në vendngjarje kishte gjetur disa gjurmë të gjakut, shkruan „Berner Zeitung“, njofton „Shtegu.com“.
Para Gjykatës në Bernë nuk ishte paraqitur personi i cili në dhjetor 2014, ishte plagosur dhe llogaritet si paditës privat. Gjykata e ka argumentuar mungesën e tij, pasi ai gjendet për momentin në një burg të Shkupit në Maqedoni, për disa delikte të tjera. Gjykata zvicerane kishte udhëtuar enkas në Shkup, për të dëgjuar argumentimet e shtetasit maqedonas.