23:35:38 2019-09-10
Përfaqësuesja e Kosovës në futboll ka pësuar disfatën e parë pas 15 ndeshjeve radhazi, pa pësuar ndonjë humbje, e që krijoi imazhin e një ekipi të fortë në krye me seleksionuesin zviceran, Bernard Challandes. Mediat e huaja menjëherë kanë reaguar pas kësaj humbje, duke e vlerësuar ndeshjen si një spektakël të vërtetë. Në këtë mënyrë, “Heute.at” e Austrisë ka shkruar se “Tre luanët” e fituan ekipin befasues të Kosovës me rezultat 5:3, pasi paraprakisht ishin në avantazh me 5:1, informon Shtegu.com.
Për vetëm 50 sekondash lojë, gjysmëfinalisti I KB, në Southampton pësoi një dush të ftohtë, pasi mysafirët kaluan në avantazh përmes Valon Berishës, i cili shënoi në mënyrë sensacionale për rezultatin 0:1.
Por, pastaj „Tre luanët“ e lëshuan në përdorim makinën e golave. Sterling (i 8-ti), Kane (19), një autogol i Vojvodinës (38) (austriakët nuk e kanë të qartë se mbiemri i lojtarit është Vojvoda v.r.) dhe dy gola të Sancho (44-të, 45 + 1) i kaluan anglezët në avantazh 5:1.
Por pas pushimit, nikoqirëve nuk iu shërbeu fati. Në këtë mënyrë, përmes Berishës (49) dhe Muriqit (55) diferenca u zvogëlua në 3:5. Më pas, Kane huqi një penallti të cilën ia mbrojti portieri Muriqi (66). Megjithatë, kosovarët nuk ia dolën të bëjnë diçka më tepër.
Suksesi i bujshëm i Kosovës përfundoi pas 15 ndeshjeve të pamposhtura në seri, përfundon gazeta austriake.
Nga ana tjetër, shtypi serb gjithashtu ka shkruar se Federata futbollistike e Kosovës është mposhtur nga Anglia në një ndeshje spektakolare, duke përdorur shprehjet e saj tashmë monotone “e ashtuquajtuara Kosovë”.
