20:47:31 2016-06-22
Gjykata federale zvicerane e ka shfuqizuar një vendim të autoriteteve të Kantonit të Valisit, me të cilën një shtetasi maqedonas ka dashur t`ia anulojë lejeqëndrimin. Ai nuk e kishte informuar ofiçarinë se në vendlindje ka pasur një fëmijë.
Në vitin 2000, gjysmë viti para se të lindte fëmija i tij, shtetasi maqedonas martohet me një zvicerane. Me këtë rast, ai pajiset me një lejeqëndrim të rregullt për Zvicër.
Në gusht të vitit 2011, martesa e tyre dështon dhe kurorëzimi prishet, shkruan „Südostschweiz“, njofton „Shtegu.com“. Pak më tepër se një vit më vonë, shtetasi maqedonas martohet me nënën e fëmijës së tij, e cila në shtator të vitit 2010 lindë një fëmijë të dytë.
Pasi shtetasi maqedonas kishte bërë kërkesë për bashkim familjar, autoritetet e Valisit mësuan se ai është prind i dy fëmijëve. Duke u bazuar në këtë fakt, ata ia morën lejen e qëndrimit.
Një gjë të tillë, ata e justifikuan me faktin se gjatë procedurës së dhënies së lejeqëndrimit, shtetasi maqedonas kishte fshehur fakte të rëndësishme, që janë të nevojshme për një martesë.
Gjykata kantonale e Valisit , në vitin 2015 e kishte konfirmuar vendimin e autoriteteve kantonale. Por, Gjykata federale tashmë e ka miratuar ankesën e shtetasit maqedonas. Ajo është e mendimit se të huajt nuk janë të obliguar të paraqesin ekzistimin e fëmijëve që janë nga një lidhje që nuk ka të bëjë me lëshimin e lejeqëndrimit zviceran.