Shqipëria arriti të kualifikohet në Kampionatin Europian të Futbollit “Franca 2016”, duke realizuar ëndrrën e tifozëve shqiptarë që i përkrahën gjatë gjithë historisë së tyre. Me fitoren 3:0 ndaj Armenisë, Kombëtarja Shqiptare u kualifikua si e dyta në grupin I, për herë të parë në historinë e futbollit shqiptar.
Djelmoshat e trajnerit Giani De Biazit shënuan tre herë, duke përmbyllur eliminatoret në vendin e dytë, me 14 pikë të grumbulluara, katër fitore, dy ndeshje baras dhe dy humbje. Ekipi shqiptar u rangua menjëherë pas Portugalisë, duke lënë pas Danimarkën që luan në “Play off”, Serbinë dhe Armeninë.
Skuadra shqiptare bëri lojë të shkëlqyer. Fillimisht shënoi lojtari i Bazelit, Shkëlzen Gashi në minutën 9`, për avantazh 0:1, ndërsa Berat Gjimshiti në minutën 24` ngriti në 0:2 në favor të shqiptarëve. Për t’i dhënë fund dilemave të fitores, ishte zëvendësuesi Armando Sadiku, i cili ngriti rezultatin në 0:3 në minutën 75` të lojës. Kombëtarja shqiptare pati edhe disa raste të tjera për të shënuar.
Pas përfundimit të lojës, filloi festa në Tiranë, Prishtinë e qytetet tjera. I tërë kombi po feston këtë ngjarje historike, duke dëshmuar se futbolli shqiptar është bërë një faktor i rëndësishëm i cili mund të fitojë edhe ekipet më të mëdha të futbollit, siç ishin fitoret ndaj Portugalisë e Francës.