Rrahet brutalisht pronari kosovar i banesës

Austri 
Pronari kosovar i një banese në Vjenë-Rudolfsheim-Fünfhaus, është rrahur rëndë nga katër qiraxhinj, pasi ka dashur t`i dëbojë nga banesa e tij. Sipas policisë austriake, kosovari 44-vjeçar është sulmuar me grushte, shqelma dhe taketuke, duke përjetuar lëndime në kafkë dhe thyerje të hundës.
Para pak ditësh, kosovari i kishte pranuar me qira katër bashkëkombas të tij në banesën e tij, në rrugën Schwendergasse. Ai rregullisht i kishte lutur ata që të paraqiteshin zyrtarisht në polici, për të mundur të nënshkruajë një marrëveshje të rregullt të qirasë. Pasi kuarteti kosovar nuk ishte pajtuar me idenë e 44-vjeçarit, ai kishte dashur t`ua hedhë gjërat nga banesa.
„Pas një diskutimi të ashpër, situata eskaloi tërësisht, qiramarrësit e sulmuan pronarin e banesës“, informon zëdhënësi i policisë austriake, Thomas Keiblinger, transmeton „Kleine Zeitung“. Pronari kishte arritur të shpëtojë, vetëm pasi kishte përdorur një sprej mbrojtës. Ai arriti të largohej deri te një park në afërsi, i ndjekur nga sulmuesit, por pasi aty u mblodhën shumë kalimtarë, sulmuesit ishin larguar në drejtim të panjohur. Policia është vënë në kërkim të tyre.