Në të gjitha qytetet e Maqedonisë pothuajse më lehtë është të gjesh një bastore sesa një barnatore. Ndërsa në rajon, shtetet po mbyllin bizneset e kumarit, vendi aktualisht ka numrin më të madh, krahasuar për kokë banori. Qytetarët thonë se aty ku shkolla dhe kazino janë nën një çati, ardhmëria e të rinjve gjithmonë mbetet një çështje fati.
Qytetarët ankohen se objektet e kumarit u kanë “mbirë” në prag të derës. Ata që i hasëm nëpër këto lokalitete me kokë ulur nuk flisnin, të tjerët nuk përmbajnë mllefin.
Nga Lëvizja “Antibixhoz” thonë se ekziston rreziku që në bastoret dhe kazinotë e Maqedonisë të infiltrohen të njëjtat biznese të lojërave të fatit, të cilat janë mbyllur në Shqipëri dhe Kosovë. Kreu i kësaj lëvizje, Xhemal Abdiu alarmon për situatën e kumarit në vend, ku qytetarëve po u imponohet të lënë paratë e fundit. Ai thotë se ky mashtrim duhet të ndalohet në mënyrë institucionale. Kundër këtij fenomeni është protestuar vazhdimisht edhe me kërkesat që objektet e lojërave të fatit të largohen 3 kilometra nga vendbanimet. Ekspertët kanë ardhur në përfundim se këto biznese paraqesin edhe potencial për pastrimin e parave. Përveç krimit financiar, sociologët thonë se varësia, kumarxhinjët i shpien drejt shkatërrimit të familjes.(Adnan Qaili/Alsat-M)